Pearl (NSS) - ဒီဇင်ဘာ ၆

မုန်းမြို့ရှိ နယ်မြေခံတပ်ရင်းအား တပ်မတော်က ပြန်လည်ထိန်းချုပ်ပြီးနောက် မုန်းမြို့အတွင်း လုံခြုံရေးလုပ်ငန်းများ ဆက်လက်လုပ်ဆောင်နေကြောင်း နစကမှ သတင်းထုတ်ပြန်ထားသည်။ 

ပြီးခဲ့သည့် ဒီဇင်ဘာလ ၃ ရက်မှစတင်၍ ပဲခူးတိုင်း၊ ကျောက်ကြီးမြို့နယ်၊ မုန်းမြို့ရှိ နယ်မြေခံတပ်ရင်းများ နှင့် မြို့ဝင်သံတံတားတို့အား KNLA၊ PDF ပူးပေါင်းအဖွဲ့က အင်အား ၁၅၀၀ ခန့်ဖြင့် လာရောက်တိုက်ခိုက်ခဲ့သဖြင့် တပ်ရင်းဌာနချုပ်ရှိ အရာရှိ၊ စစ်သည်၊ ရဲမေများက ပြန်လည်ခုခံတိုက်ခိုက်ခဲ့ရာ ဒီဇင်ဘာလ ၄ ရက်၊ နေ့လည်ပိုင်းအထိ  ထိတွေ့တိုက်ပွဲများ  ပြင်းထန်စွာဖြစ်ပွားခဲ့သည်။ 

"ဒီဇင်ဘာလ ၃ ရက်နေ့ မနက်ပိုင်းကနေစပြီး ဒီဇင်ဘာလ ၄ ရက်အထိ ပြင်းပြင်းထန်ထန်တိုက်ပွဲဖြစ် ပွားခဲ့တယ်။ ကျွန်တော်တို့အနေနဲ့ တချို့နေရာတွေမှာ မိသားစုတွေကို လုံခြုံစိတ်ချရတဲ့နေရာတွေကို ရွှေ့ပြောင်းပေးခဲ့ရတာတွေ ရှိပါတယ်။ ဒီဇင်ဘာလ ၅ ရက်၊ နံနက်ပိုင်းမှာလည်း ကျွန်တော်တို့ကစနစ်တကျ ပြန်လည်စုဖွဲ့ပြီးတော့  ပြန်လည်ဝင်ရောက်ပြီး လုံခြုံရေးလုပ်ငန်းတွေ ဆက်လက်ဆောင်ရွက်လျက်ရှိပါတယ်"ဟု ဗိုလ်ချုပ်ဇော်မင်းထွန်းက ပြောသည်။ 

အကြမ်းဖက်သမားများအနေဖြင့် ထိခိုက်ကျဆုံးမှုများပြားသော်လည်း အင်အားထပ်မံဖြည့်တင်း၍ တိုက်ခိုက်လာသည့်အတွက်  ဒီဇင်ဘာလ(၄)ရက်၊ ညနေပိုင်းတွင် မိသားစုဝင်များအား လုံခြုံသည့်နေရာသို့ လေကြောင်းအကူအညီဖြင့် ပြောင်းရွှေ့ပေးခဲ့ကြောင်း နစကဘက်က ပြောသည်။ 

ယမန်နေ့ (ဒီဇင်ဘာလ ၅ ရက်)၊ နံနက်ပိုင်းတွင် တပ်မတော်စစ်ကူစစ်ကြောင်းများဖြည့်တင်း၍ လေကြောင်းပစ်ကူ၊ လက်နက်ကြီး ပစ်ကူများရယူကာ ပြန်လည်တိုက်ခိုက်ခဲ့ရာ နေ့လည်ပိုင်းတွင် အကြမ်းဖက်သမားများသည် မြို့၏မြောက်ဘက်နှင့် အရှေ့ဘက်သို့ ပြန်လည်ဆုတ်ခွာထွက်ပြေးသွားခဲ့ကြောင်းသိရသည်။ 

"မုန်းရဲ့မြောက်ဘက်နဲ့အရှေ့ဘက်ကို ရန်သူများ ဆုတ်ခွာထွက်ပြေးပါတယ်။ ဘယ်လောက်သေတယ်၊ ဘယ်လောက်ကျဆုံးတယ်၊ ဘယ်လောက်ဒဏ်ရာရတယ်ဆိုတာက ဂုဏ်ယူပြီးပြောနေစရာ မရှိပါဘူး။ ဘယ်လိုပဲပြောပြော မြန်မာနိုင်ငံသားတွေပဲဖြစ်ပါတယ်" ဟု ဗိုလ်ချုပ်ဇော်မင်းထွန်းက ပြောသည်။

သို့သော် အကြမ်းဖက်သမားများအနေဖြင့်  ပြည်သူလူထု၏ အသက်အိုးအိမ်၊ စည်းစိမ်၊ ပြည်သူလူထု၏ လမ်းပန်းဆက်သွယ်မှု၊ ပြည်သူလူထု၏လူမှုစီးပွားဘဝလုံခြုံမှုကို ထိခိုက်လာပါက တပ်မတော်က  ပြတ်ပြတ်သားသား ချေမှုန်းသွားမည်ဖြစ်ကြောင်း ၎င်းကထပ်မံပြောသည်။

လက်ရှိတွင် အကြမ်းဖက်သမားများ ခေတ္တဝင်ရောက်နေရာယူထားသည့် မုန်းမြို့ရှိနယ်မြေခံတပ်ရင်းအား တပ်မတော်စစ်ကြောင်းများက ပြန်လည်ထိန်းချုပ်သိမ်းပိုက်နိုင်ပြီဖြစ်ပြီး မုန်းမြို့အတွင်း လုံခြုံရေးလုပ်ငန်းများ ဆက်လက်ရှင်းလင်း ဆောင်ရွက်လျက်ရှိကြောင်း သိရသည်။

ဖြစ်စဉ်တွင် အကြမ်းဖက်သမားများထံမှ အလောင်း၊ လက်နက်အချို့သိမ်းပိုက်ရရှိခဲ့ပြီး တိုက်ပွဲဖြစ်ပွားစဉ်အတွင်း အကြမ်းဖက်သမားများ၏ ဖမ်းဆီးခြင်းခံရသည့် အရာရှိ၊ စစ်သည်အချို့ နှင့် မြို့တွင်းနေရဲမေအချို့တို့အား ပြန်လည်လွတ်မြောက်ရေးအတွက်လည်း ဆောင်ရွက်လျက်ရှိကြောင်း သိရသည်။