သန့်ဇင် (NSS) - ဒီဇင်ဘာ ၄

အထူးစုံစမ်းစစ်ဆေးရေးဦးစီးဌာန(စသုံးလုံး)တွင် လက်ထောက်စုံစမ်းရေးမှူး(၆၅)ဦး ဖြည့်တင်းခန့်ထားရန် ပြင်ဆင်နေကြောင်း ပြည်ထဲရေးဝန်ကြီးဌာနမှ သိရသည်။

လက်ရှိတွင် ပြည်ထဲရေးဝန်ကြီးဌာန၌ လစ်လပ်လျက်ရှိသော လက်ထောက်စုံစမ်းရေးမှူး(၆၅)နေရာကို ဖြည့်တင်းခန့်ထားရင် အလုပ်လျှောက်လွှာများ ခေါ်ယူလျက်ရှိသည်။

အဆိုပါရာထူးနေရာ(၆၅)နေရာအတွက် လျှောက်ထားသူများအနေဖြင့် တက္ကသိုလ်တစ်ခုခုမှ ဘွဲ့ရရှိထားသူဖြစ်ရန်လိုအပ်ကာ အထူးစုံစမ်းစစ်ဆေးရေးဦးစီးဌာနမှ ထုတ်ပြန်ထားသည့် သတ်မှတ်ချက် (၁၁)ချက်ဖြင့် ကိုက်ညီရန်လိုအပ်ကြောင်း သိရသည်။

ထို့ပြင် လျှောက်လွှာလျှောက်ထားရာတွင်လည်း လိုအပ်သောအထောက်အထား စာရွက်စာတန်းများ ပူးတွဲပါဝင်ရန်လိုအပ်ပြီး အစိုးရဌာနတစ်ခုခု၏ ဝန်ထမ်းအဖြစ်မှ ထုတ်ပယ်ခြင်း၊ ရာထူးခန့်ထားခြင်းမှ အမိန့်စာပယ်ဖျက်ခြင်းခံရသူများမဖြစ်ရန်လိုအပ်ကြောင်း ဝန်ကြီးဌာနက အသိပေးထားသည်။

အရည်အချင်းစစ် ရေးဖြေစာမေးပွဲတွင် မြန်မာစာ၊ အင်္ဂလိပ်စာ၊ အထွေထွေဗဟုသုတဘာသာရပ်များကို ဖြေဆိုရမည်ဖြစ်ပြီး ရေးဖြေစာမေးပွဲအောင်မြင်သူများကို ကြံ့ခိုင်စွမ်းရည်စစ်ဆေးခြင်း၊ လူတွေ့စစ်ဆေးခြင်း၊ ဆေးအဆင့်စစ်ဆေးခြင်းများ ပြုလုပ်သွားမည်ဖြစ်ကြောင်း သိရသည်။

ထို့ကြောင့် လျှောက်ထားလိုသူများအနေဖြင့် လျှောက်လွှာများကို ယခု(ဒီဇင်ဘာလ ၂၂ ရက်)နောက်ဆုံးထားကာ မိမိတို့နေထိုင်ရာ တိုင်းဒေသကြီး/ ပြည်နယ်ရှိ အထူးစုံစမ်းစစ်ဆေးရေးဦးစီးဌာနရုံးများတွင် သွားရောက်လျှောက်ထားနိုင်ကြောင်း သိရသည်။