စော (NSS) - ဒီဇင်ဘာ ၃

ရန်ကုန်-မန္တလေး၊ မန္တလေး-ရန်ကုန် ပြေးဆွဲနေသည့် ရထားခရီးစဉ်အချိန်များကို ပြောင်းလဲသတ်မှတ်ကာ ပြေးဆွဲနေကြောင်း မြန်မာ့မီရထားထံမှ သိရသည်။

ရန်ကုန်-မန္တလေး၊ မန္တလေး-ရန်ကုန် ရထားများဖြစ်သည့် လေအိတ်အမြန်ရထား၊ လော်ကယ်ရထား၊ အမြန်ရထား များဖြင့် အထက်ပါခရီးစဉ်များကို  (ဒီဇင်ဘာ ၁ ရက်) မှစတင်ကာ အချိန်ပြောင်းလဲ ပြေးဆွဲနေခြင်းဖြစ်ကြောင်း သိရသည်။

“ရထားလမ်းပိုင်း အဆင့်မြှင့်တင်တဲ့အတွက် ရထားက အချိန်တွေကြာမြင့်နေတယ်။ တစ်လမ်းသွားနေရာကနေ နောက်တစ်လမ်းကို ပြုပြင်ပြီးတယ်။ ပြုပြင်ပြီးတာနဲ့ နှစ်လမ်းသွားလို့ရရင် ကြန့်ကြာမှုမရှိဘူးလေ။ အဲဒီ အတွက်ကြောင့် အချိန်ကို ၁၅ မိနစ်လောက် ခွာလိုက်တာပေါ့” ဟု ရန်ကုန်ဘူတာကြီးမှ ရုံပိုင်ချုပ်က NP News ကို ပြောသည်။

အမှတ် (၅) အဆန် လေအိတ်အမြန်ရထားသည် ရန်ကုန်မှ မန္တလေးသို့ ညနေ (၃)နာရီ ၃ဝ မိနစ်အချိန်တွင် စတင် ထွက်ခွာပြီး အမှတ် (၆)အစုန်လေအိတ်အမြန်ရထားသည် မန္တလေးမှ ရန်ကုန်သို့  ညနေ (၃)နာရီ ၃ဝ မိနစ်အချိန်တွင် စတင် ထွက်ခွာမည်ဖြစ်ကြောင်း သိရသည်။

ထို့ပြင် အမှတ် (၃) အဆန်အမြန်ရထားသည် ရန်ကုန်မှ မန္တလေးသို့ ညနေ (၄)နာရီ (၄၅)မိနစ်အချိန်တွင် စတင် ထွက်ခွာပြီး အမှတ် (၄) အစုန်အမြန်ရထားသည် မန္တလေးမှ ရန်ကုန်သို့ ညနေ (၄)နာရီ (၄၅)မိနစ်အချိန်တွင် စတင် ထွက်ခွာမည်ဖြစ်ကြောင်း သိရသည်။

အလားတူ အမှတ် (၁) အဆန်လော်ကယ်ရထားသည် ရန်ကုန်မှ မန္တလေးသို့ ည(၉)နာရီအချိန်တွင် စတင်ထွက်ခွာ ပြီး အမှတ် (၂) အစုန်လော်ကယ်ရထားသည် မန္တလေးမှ ရန်ကုန်သို့ ညနေ (၅)နာရီ ၃ဝ မိနစ် အချိန်တွင် စတင် ထွက်ခွာမည်ဖြစ်ကြောင်း သိရသည်။

မီးရထားခရီးစဉ် လက်မှတ်များကို Online မှတစ်ဆင့် လုံးဝ ရောင်းချမှုမရှိသေးသည့်အတွက်  မီးရထားစီးနှင်းသူ ခရီးသွားပြည်သူများအနေဖြင့် ငွေကြေးလိမ်လည်ခြင်းများ မခံရစေရန်   သတိပြုရန်လည်း မြန်မာ့မီးရထားမှ အသိပေးထုတ်ပြန်ထားသည်။