ဂျန်ဇက် (NSS) - ဒီဇင်ဘာ ၂

ထိုင်းနိုင်ငံရဲ့ ဆောင်ခရမ်ရေသင်္ကြန်ပွဲတော် ကမ္ဘာ့ရှေးဟောင်းအမွေနှစ်စာရင်းဝင်ဖို့ အလားအလာများနေတဲ့အတွက် အောင်ပွဲခံမှုတွေလုပ်ဆောင်ဖို့ ထိုင်းယဉ်ကျေးမှုဝန်ကြီးဌာနက စီစဉ်နေကြောင်း The Nation သတင်းဌာနက ဖော်ပြထားပါတယ်။ 

ထိုင်းနိုင်ငံဟာ ဆောင်ခရမ် သင်္ကြန်ပွဲတော်ကို ကမ္ဘာ့ရှေးဟောင်းအမွေနှစ်အဖြစ် သတ်မှတ်ခံရဖို့ (UNESCO) အဖွဲ့ထံတင်ပြခဲ့ပြီး ပြီးခဲ့တဲ့ဇန်နဝါရီလကတည်းက (UNESCO)ရဲ့နောက်ဆုံးဆန်ကာတင်စာရင်းထဲ ပါဝင်ခဲ့ကြောင်းသိရပါတယ်။ (UNESCO) အဖွဲ့ဟာ လာမယ့် ဒီဇင်ဘာလ ၆ ရက်မှာ(UNESCO)ရဲ့ရှေးဟောင်းအမွေနှစ်စာရင်းကို တရားဝင်ထုတ်ပြန်ကြေညာသွားဖွယ်ရှိနေရာ ရေသင်္ကြန်ပွဲတော်ဟာ ရှေးဟောင်းအမွေအနှစ်စာရင်းဝင်ဖို့ အလားအလာများနေကြောင်းသိရပါတယ်။ 

ထိုင်းယဉ်ကျေးမှုဝန်ကြီးဌာနဟာ ဆောင်ခရမ် ရေသင်္ကြန်ပွဲတော်ကို ကမ္ဘာ့ရှေးဟောင်းအမွေအနှစ်စာရင်းဝင်အဖြစ် သတ်မှတ်ခံရမယ်ဆိုပါ ဒီဇင်ဘာလ ၇ ရက်မှာ ဘန်ကောက်မြို့ရှိ Lan Khon Mueang ရင်ပြင်မှာအောင်ပွဲခံအခမ်းနားတွေကျင်းပသွားဖွယ်ရှိနေကြောင်းသိရပါတယ်။ ထွက်ပေါ်နေတဲ့သတင်းများအရ ထိုင်းအစိုးရဟာ ဆောင်ခရမ် ရေသင်္ကြန်ပွဲတော်ကိုလာမယ့်နှစ်ဧပြီလအတွင်း သုံးရက်အစား လနဲ့ချီပြီးကျင်းပဖို့လည်း စီစဉ်နေကြောင်းသိရပါတယ်။ 

ထိုင်းအာဏာရပါတီဖြစ်တဲ့ ဖြူထိုင်းပါတီခေါင်းဆောင်တစ်ဦးဖြစ်သူ ပီတွန်တန် ရှင်နာဝါထရာက "လာမယ့်နှစ်မှာကျင်းပမယ့် သင်္ကြန်ပွဲတော်အတွက် အစီအစဉ်တွေကို ဆွေးနွေးနေတယ်။ လာမယ့် နှစ်သင်္ကြန်ပွဲတော်ကို အရင်နှစ်တွေအတိုင်းကျင်းပမှာမဟုတ်ဘူး၊ကမ္ဘာ့ရေသင်္ကြန်ပွဲဖြစ်စေဖို့ ပြင်ဆင်နေတယ်"လို့ ပြောပါတယ်။