ကျော် (NSS)- ဒီဇင်ဘာ ၂

မွန်ပြည်နယ်၊ မော်လမြိုင်မြို့ရှိ မွန်ပြည်နယ်အစိုးရအဖွဲ့အိမ်ယာအနီး၌ ယမန်နေ့ (ဒီဇင်ဘာလ ၁ ရက်) ညပိုင်းက Drop Bomb ပေါက်ကွဲမှုဖြစ်ပွားခဲ့ကြောင်း ပြည်နယ်အစိုးရအဖွဲ့တာဝန်ရှိသူတစ်ဦးထံမှ သိရသည်။

ယမန်နေ့ ည ၉ နာရီခွဲကျော်ခန့်က PDF အဖွဲ့ဝင်များသည် Drone ယာဥ်အသုံးပြု၍ မော်လမြိုင်မြို့၊ ငန်းတေးရပ်ကွက်ရှိ မွန်ပြည်နယ်အစိုးရအဖွဲ့အိမ်ယာအား Drop Bomb ဖြင့်ပစ်ချတိုက်ခိုက်ခဲ့ကြောင်း သိရသည်။

ထိုသို့ ပစ်ချတိုက်ခိုက်ရာ Drop Bomb သည် အစိုးရအဖွဲ့ရုံးအိမ်ယာအနီးရှိ အရပ်သားများနေ ထိုင်သော နေအိမ်အနီးတွင် ကျရောက်ပေါက်ကွဲခဲ့ကြောင်း သိရသည်။

"ငန်းတေးဂေါက်ကွင်းအရှေ့ဖက်က ပြည်နယ်အစိုးရအဖွဲ့ရုံးအိမ်ယာနားမှာ ဖြစ်သွားတာပါ။ အခင်းဖြစ်နေရာနားမှာက အရပ်သားတွေနေထိုင်တဲ့အိမ်တွေရှိပါတယ်။ ပျက်စီးမှုကြီးကြီးမားမားမရှိသလို သေဆုံးဒဏ်ရာရတာလည်းမရှိပါဘူး"ဟု ပြည်နယ်အစိုးရ အဖွဲ့၏ တာဝန်ရှိသူတစ်ဦးက NSS ကိုပြောသည်။ 

လုံခြုံရေးအဖွဲ့ဝင်များက ပြစ်မှုကျူးလွန်သူများအား ဖမ်းဆီးရမိရေးနှင့်ဥပဒေအရထိရောက်စွာအရေးယူနိုင်ရေးတို့အတွက် စုံစမ်းစစ် ဆေးမှုများပြုလုပ်လျက်ရှိကြောင်း သိရသည်။

ပြီးခဲ့သည့် ဇူလိုင်လ ၂၂ ရက်၊ ည ၉ နာရီခန့်ကလည်း PDF အဖွဲ့ဝင်များသည် တနင်္သာရီတိုင်းအစိုးရအဖွဲ့၏ ထားဝယ်မြို့ရှိ ဝန်ကြီးများအိမ်ယာအတွင်းသို့ လက်လုပ်စိန်ပြောင်းများဖြင့်ပစ်ခတ်တိုက်ခိုက်ခဲ့ကြသည်။

အဆိုပါ လက်လုပ်စိန်ပြောင်းများသည် တိုင်းအစိုးရအဖွဲ့၏ သယံဇာတရေးရာဝန်ကြီး၊ လုံခြုံရေးနှင့်နယ်စပ်ရေးရာဝန်ကြီးတို့၏ နေအိမ်ပေါ်နှင့် နေအိမ်ရှေ့ကားရပ်နားရာနေရာပေါ်သို့ ကျရောက်ပေါက်ကွဲခဲ့သော်လည်း ထိခိုက်ဒဏ်ရာရသူမရှိခဲ့ကြောင်း သိရသည်။