Pearl (NSS) - နိုဝင်ဘာ ၂၉

မကွေးတိုင်းအတွင်း ပြည်တွင်း၊ ပြည်ပ ခရီးသွားဧည့်သည် လာရောက်လည်ပတ်မှု ယခင်နှစ်ထက် ပိုမိုတိုးတတ်လာကြောင်း မကွေးတိုင်းဝန်ကြီးချုပ် ဦးတင့်လွင်က ပြောသည်။ 

၎င်းက  ယမန်နေ့ (နိုဝင်ဘာလ ၂၈ ရက်)တွင်ကျင်းပသော မကွေးတိုင်းဒေသဆိုင်ရာခရီးသွားလုပ်ငန်းကော်မတီအစည်းအဝေးတွင် အထက်ပါကဲ့သို့ ပြောကြားခဲ့ခြင်းဖြစ်သည်။

မကွေးတိုင်းရှိ ထင်ရှားကျော်ကြားသည့် မကွေးမြသလွန်ဘုရားပွဲတော်ကို ယခုနှစ် ဝါကျွတ်ကာလတွင် စည်ကားသိုက်မြိုက်စွာ ကျင်းပနိုင်ခဲ့ပြီး အနယ်နယ်အရပ်ရပ်မှ ဘုရားဖူးပြည်သူများ လာရောက်လည်ပတ်ခဲ့ကြောင်း ဝန်ကြီးချုပ်ဦးတင့်လွင်က ‌ပြောသည်။   

ထိုကဲ့သို့ ပွဲတော်များ၊ ကြော်ငြာမြှင့်တင်မှုများ ဆောင်ရွက်နိုင်ခဲ့ပြီး ယခုနှစ် အောက်တိုဘာ လ၊ တစ်လအတွင်း ခရီးသည်ဝင်ရောက်မှုသည်  ယခင်နှစ်ထက် (၃၇)ရာခိုင်နှုန်းတိုးတက်ခဲ့ကြောင်း သိရသည်။ 

ဧည့်သည်တည်းခိုနေထိုင်မှုအနေဖြင့် ၂၀၂၃ ဇန်နဝါရီလမှ အောက်တိုဘာလအထိ (ဝ ဒသမ ၈၇) သန်းဝင်ရောက်တည်းခိုခဲ့သဖြင့် ယခင်နှစ် ၂၀၂၂ ခုနှစ် နှင့် နှိင်းယှဉ်ပါက (၂၁) ရာခိုင်နှုန်း ပိုမိုတိုးတက်လာခဲ့ကြောင်း သိရသည်။ 

ခရီးစဉ်ဒေသအသီးသီးသို့လည်း ပြည်တွင်းပြည်ပ ဧည့်သည်လည်ပတ်မှုအနေဖြင့် ၂၀၂၃ ခုနှစ် ဇန်နဝါရီလမှ အောက်တိုဘာလအထိ (၁ ဒသမ ၅)သန်း ဝင်ရောက်ခဲ့သဖြင့် ယခင်နှစ်ထက် (၅၃)ရာခိုင်နှုန်း တိုးတက်ခဲ့ကြောင်း သိရသည်။ 

ထို့ပြင် တာဝန်ရှိသူများပူးပေါင်း၍ ထိုင်းနိုင်ငံမှ ခရီးသွားဧည့်သည်(၄)ဦးကို ရန်ကုန် - မကွေး -မင်းဘူး မင်းလှ-ရေနံချောင်းခရီးစဉ် Fam Trip အဖြစ် စီစဉ်ပေးခဲ့သဖြင့် ထိုင်းခရီးသွား ဈေး ကွက် နှင့် ပြည်တွင်းဈေးကွက်ကို ကြော်ငြာရုံသာမက မကွေးတိုင်းဒေသ၏ ဘာသာရေး၊ ရှေးဟောင်းယဉ်ကျေးမှု၊ သဘာဝအလှအပများကို ပိုမိုသိရှိစေနိုင်ခဲ့ကြောင်း တိုင်းဝန်ကြီးချုပ်ဦးတင့်လွင်က ပြောသည်။ 

ထို့အတူ ရေနံချောင်းမြို့မှ ထင်ရှားသော ဂျပ်ကြားဒေသရှိ သဘာဝသဲနုတောင်ကြားလမ်းတွင် စက်ဘီးစီးခရီးစဉ် Sport Tourism ကိုလည်း မြှင့်တင်ဆောင်ရွက်လျက်ရှိကြောင်း သိရသည်။