Pearl (NSS) - နိုဝင်ဘာ ၂၉

ရွှေကျင်မြို့နယ်ရှိ ချောင်းကူးတံတားတစ်စင်းအား KNU၊ PDF ပူးပေါင်းအဖွဲ့က မိုင်းခွဲဖျက်ဆီးခဲ့ကြောင်း နစက ကသတင်းထုတ်ပြန်ထားသည်။ 

ဖြစ်စဉ်မှာ ပြီးခဲ့သည့် နိုဝင်ဘာလ (၂၇) ရက်၊ နံနက် (၃) နာရီခန့်တွင် ပဲခူတိုင်း၊ ရွှေကျင်မြို့နယ်၊ ရွှေကျင်-သိမ်ဇရပ်သွားကားလမ်းတွင် ဖြစ်ပွားခဲ့ခြင်းဖြစ်သည်။ 

အဆိုပါ ရွှေကျင်-သိမ်ဇရပ်သွားကားလမ်းပေါ်ရှိ တံတားအမှတ်(၁/၁၀၇) “ကျုံပကူ” ချောင်းကူးတံတားအား KNU နှင့် PDF ပူးပေါင်းအဖွဲ့က မိုင်းထောင်ဖောက်ခွဲဖျက်ဆီးခဲ့ကြောင်း သိရသည်။ 

ထိုသို့ မိုင်းထောင်ဖောက်ခွဲဖျက်ဆီးခဲ့မှုကြောင့် အဆိုပါတံတား၏ တောင်ဘက်ကမ်းကပ်ခုံဘက်မှ တံတားကြမ်းခင်း ၄ ပေခန့် နှင့် ဝဲ/ယာတံတား လက်ရန်း ၆ ပေခန့် ပျက်စီးခဲ့ပြီး မော်တော်ယာဉ်များ ဖြတ်သန်းသွားလာ၍ မရကြောင်း သိရသည်။

လက်ရှိတွင် ပျက်စီးခဲ့သည့် တံတားအား အများပြည်သူ ပြန်လည်အသုံးပြုနိုင်ရန် တာဝန်ရှိသူများက ပြင်ဆင်ခြင်းများဆောင်ရွက်လျက်ရှိပြီး နယ်မြေတည်ငြိမ်အေးချမ်းရေးအတွက် လုံခြုံရေးတပ်ဖွဲ့ဝင်များက လိုအပ်သော လုံခြုံရေးလုပ်ငန်းများ  ဆက်လက်ဆောင်ရွက်လျက်ရှိကြောင်းသိရသည်။ 

ပြီးခဲ့သောကာလများအတွင်းကလည်း KNU၊ PDF ပူးပေါင်းအဖွဲ့များသည် ပဲခူးတိုင်း၊ ကျောက်ကြီး၊ နတ်သံကွင်းတကြောရှိ တံတားများကို မိုင်းခွဲဖျက်ဆီးမှုများ ပြုလုပ်ခဲ့ဖူးသည်။