Pika (NSS) - နိုဝင်ဘာ ၂၉

ပြီးခဲ့သည့်နှစ်တွင် ရုရှား၏ ရှေ့တန်းနေရာများကို ချိုးဖောက်ဝင်ရောက်နိုင်ခဲ့ခြင်းမရှိသော ယူကရိန်း၏ ရှုံးနိမ့်မှုများ က နေတိုးအဖွဲ့အနေဖြင့် ရုရှားနိုင်ငံအား ဘယ်တော့မှ အထင်မသေးသင့်သည်ကို သက်သေပြနေခြင်းဖြစ်ကြောင်း နေတိုးအဖွဲ့အထွေထွေ အတွင်းရေးမှူးချုပ်ဂျန်စတိုလ်တန်ဘာ့ချ်က ပြောကြားခဲ့သည်။

အမေရိကန်ဦးဆောင်သောနေတိုးအဖွဲ့သည် လာမည့်နွေဦးရာသီတွင် ရုရှားတပ်ဖွဲ့များကို နောက်ထပ်တန်ပြန် ထိုးစစ်ဆင်မှုများ လုပ်ဆောင်ရန်အတွက် ယူကရိန်းကို စစ်လက်နက်ပစ္စည်းများ ကူညီထောက်ပံ့ပေးရန် ဆန္ဒရှိ/မရှိ ဆိုသည့်အချက်ကို သတင်းထောက်များက ဂျန်စတိုလ်တန်ဘာ့ချ် ကို မေးမြန်းခဲ့ကြောင်းလည်း သိရသည်။ 

ဂျန်စတိုလ်တန်ဘာ့ချ် က "နေတိုးအဖွဲ့ဝင်နိုင်ငံတွေဟာ ယူကရိန်းကိုပေးထားတဲ့ကတိဝတ်တွေကို တည်ခဲ့ပါတယ်။ နေတိုးအဖွဲ့ဝင်နိုင်ငံတွေဟာ စစ်လက်နက်ပစ္စည်းတွေ၊ လေကြောင်းရန်ကာကွယ်ရေးစနစ်တွေနဲ့ တိုက်လေယာဉ် တွေ ပေးပို့ခဲ့ပြီးပါပြီ။ ဂျာမနီနဲ့ နယ်သာလန်နိုင်ငံတို့ကလည်း လာမယ့်နှစ်မှာ ယူကရိန်းကို စစ်ရေးအကူအညီအဖြစ် ယူရို(၁ဝ) ဘီလျံပေးမယ်လို့ ကတိပြုခဲ့ပါတယ်" ဟု ပြောခဲ့သည်။

ယူကရိန်းသည် နေတိုးအဖွဲ့ဝင်နိုင်ငံများထံမှ သိသာသော စစ်ရေးအကူအညီများကို ရရှိခဲ့သော်လည်း ရှေ့တန်း စစ်မြေမျက်နှာပြင်တွင် သိသာထင်ရှားသောရလဒ်များ မရရှိခဲ့ကြောင်း ဂျန်စတိုလ်တန်ဘာ့ချ် က ဝန်ခံခဲ့သည်။ 

၎င်းက "ဒါဟာ ရုရှားကိုဘယ်တော့မှ အထင်မသေးသင့်ဖူးဆိုတာ ပြသနေတာပါ။ရုရှားရဲ့ ကာကွယ်ရေးလုပ်ငန်း တွေဟာ အနေအထားတစ်ခုမှာရှိနေတာဖြစ်ပြီး သူတို့ရဲ့တပ်ဖွဲ့တွေကို ခဲယမ်းမီးကျည်တွေ၊ စွမ်းရည်အသစ်တွေနဲ့ ပြန်လည်ဖြည့်တင်းမှုတွေ လုပ်ပေးနိုင်ပါတယ်" ဟု ပြောခဲ့သည်။ 

ပြီးခဲ့သည့် ဇွန်လကစတင်ခဲ့သော ယူကရိန်း၏ တန်ပြန်ထိုးစစ်ဆင်မှုများသည် ရုရှား၏ ရှေ့တန်းနေရာများကို ချိုးဖောက်ဝင်ရောက်နိုင်ခဲ့ခြင်းမျိုးမရှိခဲ့သည့်အပြင် ရလဒ်အနေဖြင့် ယူကရိန်းတပ်ဖွဲ့ဝင်(၁၀၃၀၀၀)ကျော် သေဆုံးခဲ့ကြောင်း ရုရှားကာကွယ်ရေးဝန်ကြီးဌာနက ပြောခဲ့သည်။ 

ထို့အပြင် ယူကရိန်းတပ်ဖွဲ့များသည် ရုရှားနိုင်ငံက သိမ်းယူထားသော နယ်မြေစတုရန်းကီလိုမီတာ (၁)သိန်းကျော် အနက် စတုရန်းကီလိုမီတာ(၄ဝဝ)ခန့်ကိုသာ ပြန်လည်သိမ်းယူနိုင်ခဲ့ကြောင်း ပြင်သစ်သတင်းစာ Le Monde က ပြီးခဲ့သည့်လတွင် ဖော်ပြခဲ့သည်။