မြူနစ် (NSS) - နိုဝင်ဘာ ၂၆

ကိုးကန့်အဖွဲ့ MNDAA က ပိတ်ဆို့ထားသောလမ်းများ ပြန်ဖွင့်ပေးနေသည့်အတွက် လောက်ကိုင်မြို့၌ ပိတ်မိနေသော စစ်ဘေးရှောင်အများအပြားသည် နေရပ်သို့ ပြန်လျက်ရှိကြောင်း သိရသည်။

MNDAA လက်နက်ကိုင်အဖွဲ့သည် ယခုရက်ပိုင်းအတွင်း ပိတ်ဆို့ထားသောလမ်းပိုင်းများကို ပြန်လည်ဖွင့်လှစ်ပေးခဲ့ခြင်းဖြစ်ပြီး စစ်ဘေးရှောင်အများအပြားသည် အခက်အခဲများစွာဖြင့် နေရပ်ပြန်လျက်ရှိကြောင်း သိရသည်။

ပြီးခဲ့သော ရက်ပိုင်းများအတွင်း လောက်ကိုင်မြို့၌ ပိတ်မိနေသည့် စစ်ဘေးရှောင်အများအပြားသည် လားရှိုးဘက်သို့ ထွက်ခွာလာစဉ် လောက်ကိုင်မြို့အပြင်ဘက်ရှိ ပါစင်ကျော်ကျေးရွာဂိတ်နှင့် ဆယ်တန်ဂိတ်ကြားတွင် ပိတ်မိနေသော စစ်ဘေးရှောင်အများအပြား ရှိခဲ့ဖူးသည်။

“အခုတော့ MNDAA က လမ်းဖွင့်ပေးနေတယ်။ သွားလို့ရတယ်။ ဒါပေမယ့် စစ်ဆေးတာတွေ ဘာတွေတော့ ရှိတယ်။ တချို့ကလည်း စစ်ဆေးတာမချင်တော့ တောလမ်းကနေ လမ်းလျှောက်ပြန်တဲ့သူတွေလည်းရှိတယ်။ ဆိုင်ကယ် တွေနဲ့ ပြန်တဲ့သူက များတာပေါ့။ အဲဒါက မြန်မြန်ခရီးရောက်တယ်။ ကားနဲ့ အချိန်အရမ်းကြားတယ်။ လောက်ကိုင် ကနေ နမ့်တစ်ကို ရောက်မှ “ဝ” နယ်မြေရောက်ထဲမှ အဲဒီကတစ်ဆင့် လားရှိုးဘက်ကို ပြန်ရတာပေါ့” ဟု စစ်ဘေးရှောင်တစ်ဦးက ပြောသည်။

ယမန်နေ့(နိုဝင်ဘာ ၂၅ ရက်) တွင် “ဝ”နယ်မြေ နမ့်တစ်မြို့မှတစ်ဆင့် စစ်ဘေးရှောင် (၁ဝဝဝ)ကျော်ကို ကား (၁၇) စီးဖြင့် ပို့ ဆောင်ကူညီပေးခဲ့သည်ဟု UWSA မှ တာဝန်ရှိသူတစ်ဦးက အသိပေးထားသည်။

ထို့ပြင် ယနေ့(နိုဝင်ဘာ ၂၆ ရက်)တွင်လည်း စစ်ဘေးရှောင် (၁၅ဝဝ)ခန့်ကို ကားအစီး (၂ဝ)ဖြင့် ဆက်လက်ကူညီ ပို့ဆောင်ပေးခဲ့ကြောင်း ၎င်းက ထပ်မံအသိပေးထားသည်။

ယခုရက်ပိုင်းအတွင်း လောက်ကိုင်မြို့မှ “ဝ” နယ်မြေသို့ ဖြတ်သန်းကာ နေရပ်သို့ပြန်သည့် ဆိုင်ကယ်အစီးရေ (၅ဝဝဝ)ခန့် ရှိကြောင်း သိရသည်။

“လောက်ကိုင်မှာ ကုန်ဈေးနှုန်းအရမ်းကြီးနေတယ်လေ။ ပြီးတော့ ဘာဖြစ်မယ်ဆိုတာ မသိနိုင်ဘူး။ အဲဒီတော့ နေရပ် ပြန်တဲ့လူတွေ များတာပေါ့။ အများစုကတော့ လောက်ကိုင်မှာ အလုပ်လာလုပ်တဲ့သူတွေ ပြန်တာများတယ်။ ဒီနေ့ ဆိုရင်လည်း အန်တီတို့အိမ်နားက လူ(၂၅)ယောက်လောက် လမ်းဖွင့်လို့ဆိုပြီးတော့ ပြန်သွားတာရှိတယ်” ဟု လောက်ကိုင်မြို့ခံတစ်ဦးက NP News ကို ပြောသည်။

ကိုးကန့်လက်နက်ကိုင်အဖွဲ့ MNDAA ဦးဆောင် မဟာမိတ်(၃)ဖွဲ့သည် ၎င်းတို့၏ (၁ဝ၂၇ စစ်ဆင်ရေး) မှာ လောက်ကိုင်မြို့သို့ ဦးတည်လာနေကြောင်း အသိပေးထားပြီး အဆိုပါစစ်ဆင်ရေး တစ်လပြည့်မည့် နိုဝင်ဘာ ၂၇ ရက်တွင် စစ်ရေးအရှိန်ထပ်မြှင့်မည်ဟု ကြေညာထားသည်။

လောက်ကိုင်မြို့အတွင်း ရှိနေသော တရုတ်နိုင်ငံသားများအနေဖြင့် မြို့အတွင်းမှ အမြန်ဆုံးထွက်ခွာကြရန်လည်း တရုတ်သံရုံးက အသိပေးကြေညာထားသည်ကို တွေ့ရှိရသည်။