သန့်ဇင် (NSS) - နိုဝင်ဘာ ၂၅

ရန်ကုန်တိုင်း၊ ဒဂုံမြို့နယ်ရှိ ပြည်သူ့ရင်ပြင်တွင် ဆိုင်ခန်းပေါင်း (၄၅၀)ကျော်ပါဝင်ပြသလျက်ရှိသည့် ထုတ်ကုန်စက်ပစ္စည်းများ၊ နည်းပညာပြပွဲ၊ စက်မှုထုတ်ကုန်ပစ္စည်းများနှင့် တန်ဆောင်တိုင်ဈေးရောင်းပွဲကို ယနေ့(နိုဝင်ဘာလ ၂၅ ရက်)၊ နံနက်ပိုင်းက စတင်ဖွင့်လှစ်ခဲ့သည်။

အဆိုပါ ဈေးရောင်းပွဲတော်တွင် ရန်ကုန်တိုင်းဒေသကြီးအတွင်းမှ ဆိုင်ခန်းများအပြင်၊ အခြားတိုင်းနှင့် ပြည်နယ်များမှ ဆိုင်ခန်းများလည်း ခင်းကျင်းပြသရောင်းချလျက်ရှိသည်။

ထို့ပြင်၎င်းဈေးရောင်းပွဲတော်တွင် ရန်ကုန်တိုင်းဒေသကြီးအတွင်းရှိ စက်မှုဇုန်များမှ လုပ်ငန်းရှင်များ၊ အသေးစား၊ အငယ်စား၊ အလတ်စား MSME လုပ်ငန်းရှင်များ၏ ထုတ်ကုန် အရောင်းပြခန်းများအပြင် ဆန်နှင့် ဆီအရောင်းဆိုင်များလည်း ပါဝင်ပြရောင်းချလျက်ရှိသည်။

“စက်မှုထုတ်ကုန်ပစ္စည်းတွေကို အခုလို လာရောက်ပြသခြင်းအားဖြင့် မြန်မာနိုင်ငံရဲ့ စက်မှုနည်းပညာ မြင့်မားမှုအရည်အသွေးတွေကို သိရှိနိုင်ပြီး ထုတ်ကုန် ပစ္စည်းတွေရဲ့ အရည်အသွေးတွေကိုလည်း ပိုမို သိရှိနိုင်မှာ ဖြစ်ပါတယ်။ ယနေ့ ဈေးရောင်းပွဲတော်မှာ ပြသရောင်းကြတဲ့ စက်မှုဇုန်တွေက လုပ်ငန်းရှင်တွေ MSME လုပ်ငန်းရှင်တွေအနေနဲ့ မိမိတို့ ထုတ်ကုန်တွေကို အရည်အသွေး ပိုမိုမြင့်မားလာအောင် အသုံးပြုနိုင်မယ့် စက်မှုနည်းပညာတွေကိုလည်း လေ့လာခွင့် ရှိသွားမယ်လို့ ‌မျှော်လင့်ပါတယ်” ဟု ရန်ကုန်တိုင်းဝန်ကြီးချုပ် ဦးစိုးသိန်းက ပြောသည်။

ထို့ပြင် ၎င်းဈေးရောင်းပွဲတော်အတွင်း၌ နေ့စဉ် E-Sport Game ပြိုင်ပွဲများ၊ စတုဒီသာ ကျွေးမွေးခြင်းများ၊ ရုပ်ရှင်၊ သဘင်၊ ဂီတ နှင့် ဟာသပညာရှင်များ၏ ဖျော်ဖြေတင်ဆက်မှုများ၊ Circus ၊ မျက်လှည့် ၊ Dancer များ၏ ဖျော်ဖြေတင်ဆက်မှုများ၊ မီးရှူးမီးပန်း ပစ်ဖောက်မည့် အစီအစဉ်များလည်း ပါဝင်ကြောင်းလည်း သိရသည်။

၎င်းဈေးရောင်းပွဲတော်ကို ယနေ့မှ စတင်ကာ လာမည့် (နိုဝင်ဘာလ ၂၇ ရက်)အထိ (၃)ရက်တိုင်တိုင် ခင်းကျင်းပြသရောင်းချသွားမည်ဖြစ်ပြီး ဈေးရောင်းပွဲတော်သို့ လာရောက်လည်ပတ်သူများကို YBS ယာဉ်များဖြင့် အကြို/အပို့ပြုလုပ်ပေးသွားမည်ဖြစ်ကြောင်း သိရသည်။