Pearl (NSS) - နိုဝင်ဘာ ၂၁

ကရင်ပြည်နယ်၌ ယခုနှစ် (၉)လတာ ကာလအတွင်း  ဟိုတယ်၊ တည်းခိုရိပ်သာလုပ်ငန်းမှ ငွေကျပ်သိန်း(၂၅၀၀၀)ကျော်ဝင်ငွေရရှိထားပြီး ခရီးသွားဧည့်သည် (၁၀၀) ရာခိုင်နှုန်းကျော်ပြန်လည်ဝင်ရောက် လာကြောင်း ကရင်ပြည်နယ်ဝန်ကြီးချုပ်၊ သီရိပျံချီ ဦးစောမြင့်ဦးက ပြောသည်။ 

၎င်းက ယမန်နေ့ (နိုဝင်ဘာလ ၂၀ ရက်)တွင် ကျင်းပသော ကရင်ပြည်နယ်(ဘားအံမြို့) ဟိုတယ်ဝန်ဆောင်မှုဆိုင်ရာ (အခြေခံ)သင်တန်း (၃)မျိုး၏ သင်တန်းဆင်းပွဲအခမ်းအနား၌ အထက်ပါကဲ့သို့ထည့်သွင်းပြောကြားခဲ့ခြင်းဖြစ်သည်။ 

ကရင်ပြည်နယ်တွင် ယခုနှစ် ၂၀၂၃ ခုနှစ်၊ ဖေဖော်ဝါရီလမှ အောက်တိုဘာလအထိ (၉)လအတွင်း ဟိုတယ်၊ တည်းခိုရိပ်သာများမှ ဝင်ငွေရရှိမှုသည် ငွေကျပ်သိန်း (၂၅၅၇၇ ဒသမ ၅၁)သိန်းရှိပြီး ပြည်တွင်း၊ ပြည်ပဧည့်သည် (၁၃၄၃၅၉)ဦး ဝင်ရောက်လည်ပတ်ခဲ့ကြောင်း သိရသည်။ 

ပြီးခဲ့သည့် ၂၀၂၁ ခုနှစ်၊ ဖေဖော်ဝါရီလမှ အောက်တိုဘာလအထိ(၉)လအတွင်း ဟိုတယ်၊ တည်းခိုရိပ်သာများမှ ဝင်ငွေရရှိမှုသည် ငွေကျပ်သိန်း (၆၂၈၃ ဒသမ ၁၃)သိန်းရှိခဲ့ပြီး  ပြည်တွင်း၊ ပြည်ပဧည့်သည် (၃၂၂၆၀)ဦး ဝင်ရောက်လည်ပတ်ခဲ့ကြောင်း သိရသည်။ 

ထို့ကြောင့် အဆိုပါကာလနှစ်ခုအားနှိုင်းယှဉ်ပါက ဝင်ငွေရရှိမှု နှင့် ပြည်တွင်း၊ ပြည်ပဧည့်သည် ဝင်ရောက်မှုသည် ယခင်ထက် ၁၀၀ ရာခိုင်နှုန်းကျော် ပြန်လည်တိုးတက်လာကြောင်း  ပြည်နယ်ဝန်ကြီးချုပ်က ပြောသည်။ 

ထို့ပြင် ကရင်ပြည်နယ်အတွင်း၌ ၂၀၂၁ ခုနှစ်၊ ဖေဖော်ဝါရီလ(၁)ရက်အထိ ဟိုတယ်နှင့် တည်းခိုရိပ်သာ (၄၉)လုံး၊ အိပ်ခန်းပေါင်း (၁၆၇၃)ရှိခဲ့ရာမှ ယခု ၂၀၂၃ ခုနှစ်၊ အောက်တိုဘာလကုန်အထိ ဟိုတယ်နှင့် တည်းခိုရိပ်သာ(၆၀)လုံး၊ အိပ်ခန်းပေါင်း(၂၁၅၉)ခန်းအထိရှိလာခဲ့သည့်အတွက် လုပ်ငန်းလိုင်စင် ထုတ် ပေးနိုင်မှုသည် (၂၂ ဒသမ ၄၅) ရာခိုင်နှုန်းတိုးတက်လာကြောင်း သိရသည်။ 

ကရင်ပြည်နယ်သည် လှပသည့် ရေ၊ မြေ၊ တော ၊ တောင် သဘာဝရှုခင်းများ၊ လှိုဏ်ဂူများ၊ စိမ်းစိုလှပသော စပါးခင်းကြီးများ၊ ရေတံခွန်များကို ပိုင်ဆိုင်ထားသည့်အပြင် ကရင်တိုင်းရင်းသားများ၏ ယဉ်ကျေးမှု ဓလေ့ထုံးစံများ၊ ရာသီအလိုက်ပွဲတော်များ၊  ရိုးရာမပြတ်ကျင်းပလျက်ရှိသော အခမ်းအနားများသည် ခရီးသွားလုပ်ငန်းအတွက် အရေးပါပြီး ခရီးသွားဧည့်သည်များ တစ်ကြိမ်မက လာရောက်လည်ပတ်ရန် ဆွဲဆောင်မှုရှိသော ဒေသဖြစ်ကြောင်း ၎င်းက ဆက်လက်ပြောသည်။ 

ထို့အတူ ခရီးသွားလုပ်ငန်းကို မီးခိုးမထွက်သည့် စက်ရုံဟု တင်စား ခေါ်ဝေါ်ကြပြီး နိုင်ငံတော်အတွက် ဝင်ငွေများစွာရရှိရန် ဆောင်ရွက်နိုင်သကဲ့သို့ ဒေသခံများအား အလုပ်အကိုင်အခွင့်အလမ်းရရှိခြင်း၊ ဒေသတွင်း လူမှုစီးပွားနှင့် အခြေခံအဆောက်အအုံတို့ကို ဖွံ့ဖြိုးတိုးတက်နိုင်သဖြင့် ကြိုးစားဆောင်ရွက်ရန် တိုက်တွန်းပြောကြားထားသည်။