သန့်ဇင် (NSS) - နိုဝင်ဘာ ၂ဝ

၂ဝ၂၆ ခုနှစ် ကမ္ဘာ့ဖလားခြေစစ်ပွဲ ဒုတိယအဆင့် အုပ်စုပွဲစဉ်တွင် မြောက်ကိုရီးယားအသင်း နှင့် ယှဉ်ပြိုင်ကစားမည့် မြန်မာအသင်းအနေဖြင့် ရမှတ်ရရှိအောင် ကစားသွားမည်ဖြစ်ပြီး၊ မြောက်ကိုရီးယားအသင်း အားနည်းချက်များကို သိရှိထားပြီဟု မြန်မာအသင်းဂိုးသမား ကျော်ဇင်ဖြိုးက ပြောကြားခဲ့သည်။

မြန်မာလက်ရွေးစင်အသင်းဂိုးသမား ကျော်ဇင်ဖြိုးက ယနေ့(နိုဝင်ဘာ ၂ဝ ရက်)၊ ညနေ ၅ နာရီအချိန်တွင် ရန်ကုန်မြို့၊ သုဝဏ္ဏကွင်းတွင် ပြုလုပ်သော မြောက်ကိုရီးယားအသင်းနှင့်ကစားမည့် ပွဲကြိုသတင်းစာရှင်းလင်းပွဲ၌ ယခု ကဲ့သို့ ထည့်သွင်းပြောကြားခဲ့ခြင်းဖြစ်သည်။

“ကျွန်တော်တို့ မြောက်ကိုရီးယားနဲ့တွေ့တဲ့ ပွဲစဉ်တွေမှာ သရေကျအောင်ကစားထားပါတယ်။ ခုပွဲမှာတော့ အမှတ်ရ အောင် ကစားသွားပါမယ်။ မြန်မာဘောလုံးပရိသတ်တွေက မကာအိုနဲ့ကစားခဲ့တဲ့ ပွဲကလိုမျိုး ကွင်းအတွင်း လာရောက်အားပေးကြဖို ပြောလိုပါတယ်” ဟု မြန်မာ့လက်ရွေးစင်အသင်းနည်းပြချုပ် Michael Feichtenbenir က ပြောသည်။

မြန်မာအသင်းသည် ပြီးခဲ့သည့် ဂျပန်အသင်းနှင့် ယှဉ်ပြိုင်ကစားခဲ့သည့် အုပ်စုအဖွင့်ပွဲစဉ်တွင် ခံစစ်အသားပေး ယှဉ်ပြိုင်ကစားသွားခဲ့ရာ ၅ဂိုး-ဂိုးမရှိ ဆိုသောရလဒ်ဖြင့် ရှုံးနိမ့်ခဲ့သည်။

“ပြီးခဲ့တဲ့ ဂျပန်နဲ့ပွဲစဉ်တုန်းကဆို ကျွန်တော်တို့အသင်းက ခံစစ်ချည်းပဲအသားပေးပြီး ကစားသွားခဲ့တာပေါ့နော်။ ခုလာမယ့် မြောက်ကိုရီးယားနဲ့ပွဲမှာတော့ ခံစစ်ချည်းပဲမဟုတ်ပဲနဲ့ တိုက်စစ်ကိုလဲ အသားပေး ကစားသွားမှာပါ။ မြောက်ကိုရီးယားနဲ့ပွဲကိုတော့ အမှတ်ရအောင် ကစားသွားမှာပါ။ မြောက်ကိုရီးယားအသင်းရဲ့ အားနည်းချက်တွေကို လဲ ကျွန်တော်တို့ ကြည့်ရှုထားပါတယ်” ဟု မြန်မာအသင်းဂိုးသမား ကျော်ဇင်ဖြိုးက ပြောဆိုခဲ့သည်။

မြန်မာအသင်းအနေဖြင့် မြောက်ကိုရီးယားအသင်းနှင့် ကစားပွဲသမိုင်းတစ်လျောက် (၇)ကြိမ်တွေ့ဆုံခဲ့ပြီး မြန်မာ အသင်းက (၅)ပွဲရှုံး၊ (၂)ပွဲသရေဆိုသော ရလဒ်များ ရရှိထားကြောင်း သိရသည်။

မြန်မာအသင်းအနေဖြင့် အမှန်တကယ် နိုင်ပွဲရယူဖို့ လိုအပ်နေပြီး မနက်ဖြန် နိုဝင်ဘာလ ၂၁ ရက်၊ ညနေ ၄ နာရီအချိန်ခန့်တွင် မြောက်ကိုရီးယားအသင်းအား ရန်ကုန်မြို့ရှိ သုဝဏ္ဏကွင်းတွင် လက်ခံယှဉ်ပြိုင်ကစားသွားမည်ဖြစ်သည်။