Pika (NSS) - နိုဝင်ဘာ ၁၉ 

ဖိလစ်ပိုင်သမ္မတဖာဒီနန်မားကို့စ်ဂျူနီယာသည် နိုဝင်ဘာလ(၁၇)ရက်တွင် တရုတ်သမ္မတရှီကျင့်ဖျင်နှင့်တွေ့ဆုံခဲ့ပြီး တောင်တရုတ်ပင်လယ်အတွင်းတင်းမာမှုများကို လျှော့ချရန်နှင့် ဖိလစ်ပိုင်ငါးဖမ်းသမားများ၏ ငါးဖမ်းဧရိယာများ ပြန်လည်ရရှိရေးအတွက် နည်းလမ်းများးကို ရှာဖွေခဲ့ကြောင်း သိရသည်။

ဖာဒီနန်မားကို့စ်ဂျူနီယာက "တရုတ်နဲ့ ဖိလစ်ပိုင်တို့ဟာ ငြိမ်းချမ်းရေးကို ထိန်းသိမ်းဖို့လုပ်ငန်းစဉ် တစ်စိတ်တစ်ပိုင်း အနေနဲ့ ဆက်သွယ်မှုတွေ ဆက်လက်လုပ်ဆောင်နေဖို့ လိုအပ်ပါတယ်။ ပြီးတော့ တောင်တရုတ်ပင်လယ်ကို ဖြတ်ကျော်ပြီး ရေကြောင်းလမ်းနဲ့ လေကြောင်းလမ်းတွေ ထားရှိဖို့လည်း လိုအပ်ပါတယ်။ တောင်တရုတ်ပင်လယ် အတွင်းမှာ တင်းမာမှုတွေကို လျှော့ချဖို့အတွက် ယန္တရားတွေ ဖန်တီးနိုင်ဖို့ ကျွန်တော်တို့ကြိုးပမ်းနေပါတယ်" ဟု ပြောခဲ့သည်။

ဖာဒီနန်မားကို့စ်ဂျူနီယာသည် ကယ်လီဖိုးနီးယားပြည်နယ် ဆန်ဖရန်စ္စကိုမြို့တွင် ကျင်းပသည့် APEC ထိပ်သီး အစည်းအဝေး ခေတ္တအနားယူချိန်အတွင်း သတင်းထောက်များကို ယခုကဲ့သို့ မှတ်ချက်ပေးပြောဆိုခဲ့ခြင်းဖြစ်သည်။ 

တောင်တရုတ်ပင်လယ်အတွင်း တရုတ် နှင့် ဖိလစ်ပိုင်သင်္ဘောတို့ တိုက်မိမှု အပါအဝင် အခြားဖြစ်ရပ်များနှင့် ပတ်သက်ပြီး စိုးရိမ်မိကြောင်း ဖာဒီနန်မားကို့စ်ဂျူနီယာက ပြောခဲ့သည်။

ထို့အပြင် ဖိလစ်ပိုင်ငါးဖမ်းသမားများ၏ အခက်အခဲများကိုလည်း ၎င်းက ထုတ်ဖော်ပြောဆိုခဲ့ကြောင်း သိရသည်။ ၎င်းက "ဒီရေပြင်ပေါ်မှာ ဖိလစ်ပိုင်နဲ့ တရုတ်ငါးဖမ်းသမားတို့ အတူတူငါးဖမ်းခဲ့ကြတဲ့အခြေအနေတွေကို ပြန်သွားဖို့  ကျွန်တော် တောင်းဆိုချင်ပါတယ်” ဟု ပြောခဲ့သည်။

တရုတ်၏ ကမ်းခြေစောင့်သင်္ဘောနှင့်စစ်သင်္ဘောများသည် ဖိလစ်ပိုင်နိုင်ငံ၏ မိုင်(၂ဝဝ) သီးသန့်စီးပွားရေးဇုန် အပိုင်းများတွင် ငါးဖမ်းခြင်းများကို  တားမြစ်ထားကြောင်း ဖိလစ်ပိုင်ငါးဖမ်းသမားများက ပြောခဲ့သည်။ 

ဖာဒီနန်မားကို့စ်ဂျူနီယာသည် ၂ဝ၂၂ ခုနှစ်တွင် သမ္မတရာထူးကို လွှဲပြောင်းရယူပြီးနောက် တရုတ်၏ပြိုင်ဖက် အမေရိကန်နိုင်ငံနှင့်ဆက်ဆံရေးများကို ပိုမိုမြှင့်တင်ခဲ့ကြောင်းလည်း သိရသည်။ ထို့အပြင် ဖိလစ်ပိုင်အစိုးရသည် ၎င်း၏ စစ်အခြေစိုက်စခန်းများကို အမေရိကန်စစ်တပ်အား ဝင်ရောက်ခွင့်ပေးခဲ့ခြင်းအတွက် တရုတ်အစိုးရက စိတ်ဆိုးဒေါသဖြစ်ခဲ့ကြောင်းလည်း သိရသည်။

တရုတ်အစိုးရသည် ဒုံးကျည်များ နှင့် လေယာဉ်ကွင်းများပါရှိသော လူလုပ်ကျွန်းများကို တည်ဆောက်ခဲ့ပြီးနောက် ဒေသအတွင်း တင်းမာမှုများ ယခုနှစ်အတွင်း ပိုမိုမြင့်တက်လာခဲ့ကြောင်းလည်း သိရသည်။ ဖာဒီနန်မားကို့စ်ဂျူနီယာ က "ဘယ်သူကမှ စစ်ပွဲကို မလိုချင်ကြဘူးလို့ ကျွန်တော်ထင်ပါတယ်" ဟု ပြောခဲ့သည်။