Pika (NSS) - နိုဝင်ဘာ ၁၅

အင်ဒိုနီးရှားနိုင်ငံသည် BRICS စီးပွားရေးအုပ်စုတွင် အဖွဲ့ဝင်နိုင်ငံအဖြစ် ပါဝင်လာနိုင်ကြောင်း အင်ဒိုနီးရှားသမ္မတလောင်း Prabowo Subianto က ထုတ်ဖော်ပြောခဲ့သည်။

Prabowo Subianto သည် နိုင်ငံခြားရေးမူဝါဒဆိုင်ရာ မဟာဗျူဟာမြောက် မဲဆွယ်စည်းရုံးရေး မိန့်ခွန်းတွင် ယခုကဲ့သို့ ထုတ်ဖော်ပြောခဲ့ခြင်းဖြစ်သည်။ အဆိုပါလှုပ်ရှားမှုသည် နိုင်ငံ၏စီးပွားရေးအတွက် အကျိုးဖြစ်ထွန်းစေ မည်ဆိုလျှင် အင်ဒိုနီးရှားနိုင်ငံသည် BRICS အဖွဲ့တွင် အဖွဲ့ဝင်နိုင်ငံအဖြစ် မပါဝင်သင့်သည့် အကြောင်းပြချက်များ မရှိကြောင်း လက်ရှိအချိန်တွင် အင်ဒိုနီးရှားနိုင်ငံ ကာကွယ်ရေးဝန်ကြီးအဖြစ် တာဝန်ထမ်းဆောင်နေသော Prabowo Subianto က ပြောခဲ့သည်။

၎င်းက "ကျွန်တော်တို့ဟာ G20 အဖွဲ့၊ အာဆီယံအဖွဲ့၊ APEC တို့ရဲ့တစ်စိတ်တစ်ပိုင်းအဖြစ် ပါဝင်နေပါတယ်။ ကျွန်တော်တို့ရဲ့စီးပွားရေးကို အကျိုးဖြစ်ထွန်းမှုတွေ ရှိစေမယ်ဆိုရင် BRICS အဖွဲ့မှာ မပါဝင်ရမယ့် အကြောင်းပြချက်က မရှိပါဘူး" ဟု ပြောခဲ့သည်။

ထို့အပြင် အင်ဒိုနီးရှားနိုင်ငံသည် လွတ်လပ်သော နိုင်ငံခြားရေးမူဝါဒကို အကောင်အထည်ဖော်နိုင်ရန်အတွက် အမြဲတမ်းမျှော်မှန်းထားကြောင်း Prabowo Subianto က ပြောခဲ့သည်။ အင်ဒိုနီးရှားနိုင်ငံ၏ စီးပွားရေးသည် ကုန်သွယ်မှုများအပေါ်တွင် မူတည်နေပြီး နိုင်ငံရေးဆုံးဖြတ်ချက်များအားလုံးကို စီးပွားရေးအကျိုးဖြစ်ထွန်းမှုများ ဖြင့် လမ်းညွှန်လုပ်ဆောင်ရန်လိုအပ်ကြောင်း Prabowo Subianto က အလေးပေးပြောကြားခဲ့သည်။

လက်ရှိအချိန်တွင် BRICS အဖွဲ့မှာ ဘရာဇီး၊ ရုရှား၊ အိန္ဒိယ၊ တရုတ် နှင့် တောင်အာဖရိကတို့ ပါဝင်နေပြီး ၂ဝ၂၄ ခုနှစ် ဇန်နဝါရီလတွင် အာဂျင်တီးနား၊ အီဂျစ်၊ အီသီယိုးပီးယား၊ အီရန်၊ ဆော်ဒီအာရေးဗျနှင့် ယူအေအီးတို့က အဖွဲ့ဝင် နိုင်ငံအဖြစ် ပါဝင်လာမည်ဖြစ်ကြောင်း သိရသည်။

ထို့အပြင် BRICS အဖွဲ့၏ စီးပွားရေးသည် စက်မှုဖွံ့ဖြိုးပြီးနိုင်ငံများဖြစ်သော အမေရိကန်၊ ကနေဒါ၊ ဗြိတိန်၊ ပြင်သစ်၊ အီတလီ၊ ဂျာမနီ နှင့် ဂျပန်နိုင်ငံတို့ပါဝင်သည့် G7 အဖွဲ့ထက် ပိုမိုကြီးထွားလာနေပြီဖြစ်ကြောင်း လေ့လာသုံးသပ်သူ များ၏ ခန့်မှန်းချက်များအရ သိရသည်။