NSS - နိုဝင်ဘာ ၁၁

ရန်ကုန်တိုင်း၊ မြောက်ဥက္ကလာပမြို့နယ်တွင် ရွှေဆိုင်ပိုင်ရှင်အမျိုးသမီးတစ်ဦးကို သေနတ်ဖြင့်ပစ်ခတ်ကာ ကျပ်သိန်းပေါင်းများစွာတန်ဖိုးရှိ လက်ဝတ်ရတနာများကို ဓားပြတိုက်လုယက်မှု ဖြစ်ပွားခဲ့ကြောင်း လုံခြုံရေးတပ်ဖွဲ့နှင့် နီးစပ်သူများထံမှ သိရသည်။

ယမန်နေ့(နိုဝင်ဘာလ ၁၀ ရက်)၊ ညနေ ၆နာရီ ၂၀မိနစ်တွင် မြောက်ဥက္ကလာပမြို့နယ်၊ (၁)ရပ်ကွက်၊ သုမိတ္တာ(၂၂)လမ်း၊ အမှတ်(၈၆၇) နေအိမ်အရှေ့တွင် အထက်ပါကဲ့သို့ ဖြစ်ပွားခဲ့ကြောင်း သိရသည်။

မြောက်ဥက္ကလာပမြို့နယ်ရှိ (ဈ)ဈေးတွင်ဖွင့်လှစ်ထားသည့် “ခန့်မြတ်ချယ် စိန်/ရွှေ ရတနာပစ္စည်းရောင်းဝယ်ရေး”ဆိုင်မှ မအေးသဇင်နွယ် (၃၅)နှစ်သည် ၎င်းနေအိမ်သို့ ကားဖြင့် ပြန်လာခဲ့ပြီး ကားပေါ်မှ ဆင်းနေစဉ် လူ(၃)ဦးက ဆိုင်ကယ်(၃)စီးဖြင့်ရောက်ရှိလာကာ ခြံဝန်းအတွင်း ဝင်ရောက်ပြီး သေနတ်ဖြင့် ချိန်၍ ရွှေထည်ပစ္စည်းများထည့်ထားသည့် အိတ်အားအကြမ်းဖက်တောင်းယူခဲ့ကြောင်း သိရသည်။

ထို့နောက် မအေးသဇင်နွယ်က ဓားပြဟုအော်ဟစ်သည့်အခါ သေနတ်ဖြင့်ပစ်ခတ်၍ ငွေကျပ်သိန်း(၁၀၀၀၀)ခန့်တန်ဖိုးရှိ စိန်၊ ရွှေထည် ပစ္စည်းထည့်ထားသည့် အိတ်အားလုယူထွက်ပြေးသွားခဲ့ကြောင်း သိရသည်။

ထိုသို့ သေနတ်ဖြင့် ပစ်ခတ်ခံရမှုကြောင့် မအေးသဇင်နွယ်တွင် ဝဲလက်မောင်းကျည်ထိမှန်ဒဏ်ရာတစ်ချက်ရရှိခဲ့သဖြင့် မြောက်ဥက္ကလာပ မြို့နယ်ပြည်သူ့ဆေးရုံသို့ ပို့ဆောင်ထားရကြောင်း သိရသည်။

ထို့ကြောင့် ပြစ်မှုကျူးလွန်သူများအား ဖမ်းဆီးရမိရေးအတွက် သက်ဆိုင်ရာနှင့်လုံခြုံရေးတပ်ဖွဲ့ဝင်များက စုံစမ်းစစ်ဆေးမှုများ ပြုလုပ်လျက်ရှိကြောင်း သိရသည်။