NSS - နိုဝင်ဘာ ၆

စစ်ကိုင်းတိုင်း၊ ဆားလင်းကြီးမြို့နယ်တွင် PDF အဖွဲ့ထောင်ထားသည့် လက်လုပ်မိုင်းတစ်လုံးပေါက်ကွဲမှုကြောင့် အသက်မပြည့်သေးသည့် မိန်းကလေးငယ် မိုင်းစထိမှန်သေဆုံးသွားခဲ့ကြောင်း ရဲတပ်ဖွဲ့က သတင်းထုတ်ပြန်ထားသည်။

လက်လုပ်မိုင်းပေါက်ကွဲမှုသည် ပြီးခဲ့သော နိုဝင်ဘာ ၃ ရက်၊ နံနက် ၁၁ နာရီက ဆားလင်းကြီးမြို့နယ်၊ အမှတ်(၁) ရပ်ကွက်တွင် ဖြစ်ပွားခဲ့ကြောင်း သိရသည်။

အဆိုပါရပ်ကွက်နေ မမိုးသဇင်(၁၂)နှစ်သည် ၎င်း၏ နေအိမ်ခြံဝန်းအတွင်းရှိနေစဉ် PDF အဖွဲ့ထောင်ထားသည့် လက်လုပ်မိုင်းပေါက်ကွဲခဲ့ရာမှ မမိုးသဇင်၏ ဦးခေါင်း၌ မိုင်းစထိမှန်ဒဏ်ရာရရှိကာ အခင်းဖြစ်နေရာတွင် သေဆုံးသွားခဲ့ကြောင်း ရဲတပ်ဖွဲ့၏ ထုတ်ပြန်ချက်အရ သိရသည်။

ထို့ကြောင့် မမိုးသဇင်၏ရုပ်အလောင်းအား မုံရွာခရိုင်ပြည်သူ့ဆေးရုံကြီးသို့ ပို့ဆောင်ပေးခဲ့ကြပြီး ပြစ်မှုကျူးလွန်သူများအား ဖမ်းဆီးရမိရေးနှင့်ဥပဒေအရ ထိရောက်စွာအရေးယူနိုင်ရေးတို့အတွက် လုံခြုံရေးတပ်ဖွဲ့ဝင်များက စုံစမ်း စစ်ဆေးမှုများ ပြုလုပ်လျက်ရှိကြောင်း သိရသည်။