ဂျန်ဇက် (NSS) - နိုဝင်ဘာ ၅ 

အစ္စရေးဝန်ကြီးချုပ် နေတန်ရာဟုရဲ့နေအိမ်အပြင်ဘက်မှာ စိတ်ဆိုးဒေါသဖြစ်နေတဲ့လူအုပ်စုတစ်စုက နိုဝင်ဘာ ၄ ရက်၊ ညပိုင်းက ဆန္ဒပြပွဲများလုပ်ဆောင်ခဲ့တဲ့အတွက် အစ္စရေးရဲတပ်ဖွဲ့က ထိန်းသိမ်းခဲ့ရကြောင်း သိရပါတယ်။ 

ဆန္ဒပြအုပ်စုတွေဟာ အစ္စရေးနိုင်ငံအလံများကိုဝှေ့ယမ်းပြီး အစ္စရေးဝန်ကြီးချုပ်နေတန်ရာဟုကို ထောင်ထဲပို့ပစ်ဖို့ တောင်းဆိုခဲ့ပါတယ်။ ဆန္ဒပြအုပ်စုတွေဟာ ဝန်ကြီးချုပ်နေတန်ရာဟုရဲ့အိမ်အပြင်ဘက်မှာရှိတဲ့ ရဲတပ်ဖွဲ့အတား အဆီးများကို ဖြတ်ကျော်ဖို့ ကြိုးပမ်းခဲ့ကြောင်း သိရပါတယ်။ ဟားမက်စ်လက်နက်ကိုင်အုပ်စုဟာ အစ္စရေးနိုင်ငံကို စတင်တိုက်ခိုက်ခဲ့ပြီးနောက် အစ္စရေးတပ်ဖွဲ့ဝင်များ အပါအဝင် လူပေါင်း ၂၄ဝ ကျော်ကို ပြန်ပေးဆွဲခဲ့ကြောင်း သိရပါတယ်။ 

ဝန်ကြီးချုပ်နေတန်ရာဟု အိမ်အပြင်ဘက်မှာ လာရောက်ဆန္ဒပြသူအုပ်စုများဟာ ဂါဇာဒေသကို တိုက်ခိုက်နေတဲ့ အစ္စရေးရဲ့တိုက်ခိုက်မှုတွေ ရပ်တန့်ဖို့၊ အပစ်ခတ်ရပ်စဲဖို့ တောင်းဆိုခဲ့ကြောင်း သိရပါတယ်။ ပြန်ပေးဆွဲခံထားရသူ မိသားစုများကလည်း ၎င်းတို့ရဲ့မိသားစုဝင်များကို ဘေးကင်းစွာနဲ့ အိမ်ကို ပြန်ခေါ်ဆောင်ပေးဖို့ အစ္စရေးအစိုးရကို တောင်းဆိုတိုက်တွန်းထားကြောင်း သိရပါတယ်။

အစ္စရေးတပ်ဖွဲ့တွေဟာ ဟားမက်စ်အဖွဲ့ရဲ့တိုက်ခိုက်မှုများကို လက်တုံ့ပြန်မှုအဖြစ် ဂါဇာဒေသကို အောက်တိုဘာ ၇ ရက်ကတည်းက ဗုံးကြဲတိုက်ခိုက်မှုတွေ၊ မြေပြင်ထိုးစစ်ဆင်မှုတွေလုပ်ဆောင်ခဲ့ရာ လက်ရှိအချိန်မှာ လူပေါင်း အနည်းဆုံး ၉ဝဝဝ ကျော် သေဆုံးခဲ့ကြောင်း သိရပါတယ်။

ဂါဇာဒေသမှာ ဖြစ်ပွားနေတဲ့စစ်ပွဲနဲ့ပတ်သက်ပြီး ကမ္ဘာတဝန်းရှိ နိုင်ငံအချို့မှာ အစ္စရေးလိုလားတဲ့ ထောက်ခံပွဲတွေ၊ ပါလက်စတိုင်းလိုလားတဲ့ထောက်ခံပွဲတွေ ဖြစ်ပွားလျက်ရှိနေပါတယ်။ အစ္စရေးဝန်ကြီးချုပ်ကတော့ ပြန်ပေးဆွဲ ခံထားရသူတွေ ပြန်မလွှတ်ပေးဘူးဆိုရင် ဂါဇာဒေသကို တိုက်ခိုက်မှုတွေ ရပ်တန့်ခြင်း၊ အပစ်ခတ်ရပ်စဲခြင်းများ ရှိလာမှာမဟုတ်ကြောင်း ပြီးခဲ့တဲ့ရက်ပိုင်းက ပြောခဲ့ပါတယ်။

မကြာသေးမီက ကောက်ယူခဲ့တဲ့စစ်တမ်းတစ်ရပ်မှာ အစ္စရေးနိုင်ငံသား လေးပုံမှာ သုံးပုံကျော်က ဝန်ကြီးချုပ် နေတန်ရာဟုကို ရာထူးက နှုတ်ထွက်ဖို့ လိုလားနေကြောင်း သိရပါတယ်။ အစ္စရေးပြည်သူတွေဟာ နိုင်ငံရေးဆိုင်ရာ ကိစ္စများအပြင် လုံခြုံရေးဆိုင်ရာကိစ္စတွေကြောင့် ဝန်ကြီးချုပ်နေတန်ရာဟုကို မကျေနပ်မှုတွေ မြင့်တက်လာနေကြောင်း သိရပါတယ်။