ဂျန်ဇက် (NSS) - နိုဝင်ဘာ ၄ 

အမေရိကန်စစ်ဌာနချုပ် ပင်တဂွန်ဟာ ဂါဇာဒေသမှာ အမေရိကန်နိုင်ငံထုတ်  ဒရုန်းတွေ အသုံးပြုပေးနေတယ်လို့ ပထမဆုံးအကြိမ် အတည်ပြုပြောဆိုလိုက်ပါတယ်။

အဆိုပါဒရုန်းတွေ ကူညီပေးခြင်းဟာ ဟားမက်စ်လက်နက်ကိုင်အဖွဲ့ ပြန်ပေးဆွဲခံရသူတွေကို ပြန်ကယ်တင်နိုင် အောင် ကူညီပေးတာမျိုးဖြစ်ကြောင်း၊ ဂါဇာဒေသမှာပြုလုပ်နေတဲ့ အစ္စရေးရဲ့စစ်ဆင်ရေးတွေကို ပံ့ပိုးပေးတာမျိုး မဟုတ်ကြောင်း အမေရိကန်စစ်ဘက်က ပြောပါတယ်။ 

ဟားမက်စ်လက်နက်ကိုင်အဖွဲ့ဟာ အစ္စရေးနိုင်ငံကို စတင်တိုက်ခိုက်ခဲ့ပြီး အစ္စရေးစစ်သားတွေ အပါအဝင် လူပေါင်း ၂၃ဝ ကျော်ကို ပြန်ပေးဆွဲ ဖမ်းဆီးခေါ်ဆောင်ခဲ့ပါတယ်။ ကုလသမဂ္ဂ အပါအဝင် နိုင်ငံတကာအဖွဲ့အစည်းတွေက ပြန်ပေးဆွဲခံထားရသူတွေကို ပြန်လွှတ်ပေးဖို့ တောင်းဆိုနေပါတယ်။ 

အမေရိကန်စစ်ဘက်ပြောရေးဆိုခွင့်ရှိသူ ဗိုလ်ချုပ်ပက်ထရစ်ရိုင်ဒါက "ကျွန်တော်တို့ဟာ ပြန်ပေးဆွဲခံထားရသူတွေ ကို ပြန်ရှာတွေ့အောင် ဒရုန်းတွေနဲ့ ကူညီပေးနေပါတယ်။ ပြန်ပေးဆွဲခံထားရသူတွေကို အမြန်ဆုံးပြန်ရှာတွေ့အောင် အစ္စရေးနိုင်ငံကို လိုအပ်တဲ့အကြံဉာဏ်တွေလည်း ပေးနေပါတယ်" လို့ ပြောပါတယ်။

အမေရိကန်ဟာ ဂါဇာဒေသမှာ  MQ-9 Reaper ဒရုန်းတွေ စေလွှတ်ပြီး ပြန်ပေးဆွဲခံထားရသူတွေကို ရှာဖွေဖို့ ကြိုးပမ်းနေတာဖြစ်ကြောင်း သိရပါတယ်။ အဲဒီဒရုန်းတွေဟာ အစ္စရေးတပ်ဖွဲ့တွေ မြေပြင်ထိုးစစ်ဆင်နွဲနေတဲ့ နေရာ နဲ့ ၁၅ မိုင်အကွာဝေးမှာ ရှိနေကြောင်း သိရပါတယ်။ အဲဒီဒရုန်းတွေဟာ အမြင်ပေ ၂၅ဝဝဝ ပေကနေ အချိန် သုံးနာရီ ကြာ ပျံသန်းနိုင်ကြောင်း သိရပါတယ်။

အဆိုပါဒရုန်းတွေကို  အမေရိကန်အထူးတပ်ဖွဲ့က စီမံခန့်ခွဲနေခြင်းဖြစ်ကြောင်း သိရပါတယ်။ အမေရိကန်ဟာ အစ္စရေး နဲ့ ဟားမက်စ်လက်နက်ကိုင်အဖွဲ့ကြား စစ်ပွဲဖြစ်ပွားခဲ့ပြီးနောက်ပိုင်း အရှေ့အလယ်ပိုင်းဒေသကို လေယာဉ်တင်သင်္ဘောတွေနဲ့ မရိန်းတပ်ဖွဲ့ဝင်တွေ စေလွှတ်ခဲ့ကြောင်း သိရပါတယ်။ 

အမေရိကန်နိုင်ငံဟာ အစ္စရေးနဲ့ ဟားမက်စ်ဖြစ်ပွားနေတဲ့စစ်ပွဲမှာ အစ္စရေးဘက်က ရပ်တည်နေပြီး စစ်လက်နက် ပစ္စည်းများကူညီပေးပေမယ့် စစ်ပွဲမှာ တိုက်ရိုက်ပါဝင်မှာ မဟုတ်ဘူးလို့ ပြောပါတယ်။