စော (NSS) - နိုဝင်ဘာ ၃

နိုင်ငံရေးအခြေအနေကြောင့် ရပ်နားခဲ့ရသည့် မိုးကောင်း-မြစ်ကြီးနား-မိုးကောင်း ရထားခရီးစဉ်ကို ပြန်လည်ပြေးဆွဲခဲ့ကြောင်း သိရသည်။

အဆိုပါရထားခရီးစဉ်ကို  ပြီးခဲ့သည့် ၂၀၂၁ ခုနှစ် ဖေဖော်ဝါရီလ (၈)ရက်မှစတင်၍ နိုင်ငံရေးအခြေအနေကြောင့် ရပ်နားထားခဲ့ရာမှ ယခု ၂၀၂၃ ခုနှစ် (နိုဝင်ဘာလ ၁ ရက်)တွင် ပြန် လည်ပြေးဆွဲခဲ့ခြင်းဖြစ်ကြောင်း သိရသည်။

“ပြန်လည်ပြေးဆွဲတော့ ဒေသခံတွေခရီးသွားလာရတာ အဆင်ပြေမှာပေါ့။ ကားလမ်းမပေါက်တဲ့‌ ဒေသတွေကြတော့ ရထားလေး နဲ့ မြစ်ကြီးနားကို သွားလို့လာလို့အဆင်ပြေတာပေါ့။ ရထားကို စီးနင်းတဲ့အများစုကတော့ ဒေသခံတွေပဲစီးနင်းတာပေါ့”ဟု မြစ်ကြီးနားဘူတာမှ တာဝန်ရှိသူတစ်ဦးက NSS ကိုပြောသည်။

အဆိုပါ ခရီးစဉ်တွင် လိုက်ပါစီးနင်းကြမည့် ခရီသည်များအတွက် စတင်ဖွင့်လှစ်သည့်နေ့မှ တစ်ပတ်အထိကို အခမဲ့ပြေးဆွဲပေးသွားမည်ဖြစ်ကြောင်း သိရသည်။ 

မိုးကောင်း-မြစ်ကြီးနား-မိုးကောင်း ရထားခရီးစဉ်လမ်းပိုင်းသည် (၃၆ ဒသမ ၇၅)မိုင်ရှိပြီး ၎င်းခရီးစဉ်အတွင်း ဘူတာ (၇)ခုနှင့် ရပ်နားစခန်း (၁)ခုပါဝင်ကြောင်း သိရသည်။

ရထားခရီးစဉ်ကို မိုးကောင်းဘူတာမှ နေ့စဉ် နံနက် (၇)နာရီမှ ထွက်ခွာပြီး မြစ်ကြီးနားဘူတာသို့ နံနက် (၉)နာရီခွဲအချိန်တွင် ဆိုက်ရောက်ကာ မြစ်ကြီးနားဘူတာမှ မွန်းလွဲ(၂)နာရီအချိန်တွင် ပြန်လည်ထွက်ခွာ၍ မိုးကောင်းဘူတာသို့ ညနေ (၄)နာရီခွဲအချိန်တွင် ပြန်လည်ဆိုက် ရောက်ကြောင်း သိရသည်။