ဂျန်ဇက် (NSS) - နိုဝင်ဘာ ၁

ရုရှားအစိုးရဟာ ဆီးရီးယားနိုင်ငံကိုတိုက်ခိုက်ဖွယ်ရှိနေတဲ့အစ္စရေးနိုင်ငံကို သတိပေးပြောဆိုလိုက်ပြီး အရှေ့အလယ် ပိုင်းဒေသကို စစ်ပွဲကူးစက်ပျံ့နှံ့လာမှာကို လုံးဝလက်မခံနိုင်ကြောင်း ပြောပါတယ်။ 

ဆီးရီးယားနိုင်ငံအပေါ် အစ္စရေးရဲ့တိုက်ခိုက်မှုတွေနဲ့ပတ်သက်ပြီး ဆီးရီးယားနိုင်ငံခြားရေးဝန်ကြီးနဲ့ ရုရှားနိုင်ငံခြား ရေးဝန်ကြီးတို့ ဆွေးနွေးခဲ့ကြောင်း သိရပါတယ်။ 

ဘိုလီဗီးယားနိုင်ငံဟာ ဂါဇာဒေသရှိ ပါလက်စတိုင်း လူမျိုးတွေအပေါ် စစ်ရာဇဝတ်မှုကျူးလွန်နေခြင်းနဲ့ပတ်သက်ပြီး အစ္စရေးနိုင်ငံနဲ့ သံတမန်ဆက်ဆံရေး ဖြတ်တောက်လိုက်ကြောင်း သိရပါတယ်။ ဘိုလီဗီးယား နိုင်ငံခြားရေးဝန်ကြီး ဌာန ဒုတိယဝန်ကြီးက ဂါဇာဒေသအပေါ်ပြုလုပ်နေတဲ့ အစ္စရေးရဲ့ထိုးစစ်ဆင်တိုက်ခိုက်မှုတွေ၊ ရန်လိုမှုတွေကို ပြစ်တင်ရှုတ်ချကြောင်း၊ အစ္စရေးနိုင်ငံ နဲ့ သံတမန်ဆက်ဆံရေးဖြတ်တောက်လိုက်ကြောင်း ပြောပါတယ်။ 

ယူကရိန်း၊ အစ္စရေးနိုင်ငံတို့ကို စစ်ရေးအကူအညီဘတ်ဂျက် ချပေးရေးနဲ့ပတ်သက်ပြီး အမေရိကန်အထက် လွှတ်တော်အတွင်း ဆွေးနွေးပွဲကျင်းပနေချိန်အတွင်း ဆန္ဒပြပွဲများဖြစ်ပွားခဲ့ကြောင်း သိရပါတယ်။ ဆန္ဒပြသူများဟာ အစ္စရေးနဲ့ ဟားမက်စ်လက်နက်ကိုင်အဖွဲ့ကြားဖြစ်ပွားနေတဲ့စစ်ပွဲအဆုံးသတ်ရေးအတွက် အမေရိကန်သမ္မတ ဂျိုးဘိုင်ဒန်ကို ဖိအားပေးဖို့ တောင်းဆိုခဲ့ခြင်းဖြစ်ကြောင်း သိရပါတယ်။

အစ္စရေးဝန်ကြီးချုပ်နေတန်ရာဟုက ဂါဇာဒေသရှိ ဟားမက်စ်လက်နက်ကိုင်အဖွဲ့အပေါ် အနိုင်ရအောင် အလုပ်ကို အကောင်းဆုံးလုပ်ကိုင်သွားမှာဖြစ်ကြောင်း၊ ဟားမက်စ်လက်နက်ကိုင်အဖွဲ့အပေါ် နိုင်ပွဲရယူနိုင်ချိန်အထိ တိုက်ခိုက် သွားမှာဖြစ်ကြောင်း၊ စစ်ပွဲကခက်ခဲပြီး အချိန်ကြာရှည်နိုင်ကြောင်း ပြောပါတယ်။

အစ္စရေးတပ်ဖွဲ့တွေဟာအောက်တိုဘာ ၂၇ ရက်မှာ ဂါဇာဒေသကိုမြေပြင်ထိုးစစ်ဆင်နွှဲနေပြီး ဟားမက်စ်အဖွဲ့များနဲ့ အပြန်အလှန်တိုက်ခိုက်နေကြောင်း သိရပါတယ်။

အစ္စရေးနိုင်ငံရဲ့ထိုးစစ်ဆင်တိုက်ခိုက်မှုတွေကြောင့် ဂျေရုဆလင်မြို့ အပါအဝင် အနောက်ဘက်ကမ်းခြေရှိ မြို့များ မှာ အစ္စရေးနိုင်ငံရဲ့တိုက်ခိုက်မှုတွေကိုပြစ်တင်ရှုတ်ချတဲ့ ဆန္ဒပြပွဲများ အောက်တိုဘာ ၃၁ ရက်က လုပ်ဆောင်ခဲ့ပြီး တက္ကသိုလ်များ၊ ဈေးဆိုင်များ၊ ဘဏ်များ ပိတ်ထားခဲ့ရကြောင်း သိရပါတယ်။ အစ္စရေးရဲ့တိုက်ခိုက်မှုကြောင့် ဂါဇာ ဒေသမှာ ပါလက်စတိုင်းလူမျိုး အနည်းဆုံး ၈၅ဝဝ ကျော် သေဆုံးထားကြောင်း သိရပါတယ်။ 

အနောက်ဘက်ကမ်းခြေဒေသမှာ ပြီးခဲ့တဲ့သီတင်းပတ်တွေကတည်းက တင်းမာမှုအရှိန်မြင့်တက်လာနေကြောင်း သိရပါတယ်။ 

အစ္စရေးရဲ့လေကြောင်းကနေ ဗုံးကြဲတိုက်ခိုက်မှုကြောင့် အောက်တိုဘာ ၃၁ ရက်က Jabalia ဒုက္ခသည်စခန်းမှာ ရှိနေတဲ့ ပြန်ပေးဆွဲခံရသူ ၇ ဦး သေဆုံးသွားခဲ့ကြောင်း၊ အဲဒီသေဆုံးသူတွေထဲမှာ နိုင်ငံခြား ပတ်စပိုစ့် ကိုင်ဆောင် ထားသူ ၃ ဦး ပါဝင်ကြောင်း သိရပါတယ်။ ဟားမက်စ်အဖွဲ့ဟာ အစ္စရေးနိုင်ငံကို တိုက်ခိုက်ခဲ့ပြီးနောက် လူပေါင်း ၂၃၉ ဦးကို ဖမ်းဆီးထားပြီး ၄ ဦးသာ ပြန်လွှတ်ပေးထားကြောင်း သိရပါတယ်။