NSS - အောက်တိုဘာ ၂၇

ရန်ကုန်မြို့၊ ကြည့်မြင်တိုင်မြို့နယ်တွင် YBS ယာဉ် (၂)စီးနှင့် ကွန်တိန်နာကားတို့ ဝင်တိုက်မှုဖြစ်ပွားခဲ့ပြီး ထိခိုက်ဒဏ်ရာရရှိသူ ၃ ဦးရှိခဲ့သည့်အနက် (၁)ဦးသည် စိုးရိမ်ရကြောင်း ရောင်စဉ်မဲ့လူမှုကူညီရေးအသင်းမှ သိရသည်။

ယနေ့ အောက်တိုဘာလ (၂၇)ရက်၊ နံနက် ၉ နာရီကျော်အချိန်က YBS ယာဉ် (၂)စီး တိုက်မိစဉ်လွတ်နေသည့် နေရာကြားထဲသို့ ကွန်တိန်နာကားက ထပ်မံတိုက်မိမှုဖြစ်ပွားခဲ့ခြင်းကြောင့် YBS ကားပေါ်မှ ခရီးသည် (၃)ဦး ထိခိုက်ဒဏ်ရာရရှိခဲ့ရာ (၁)ဦးသည် စိုးရိမ်ရကြောင်း ရောင်စဉ်မဲ့လူမှုကူညီရေးအသင်းမှ တာဝန်ရှိသူတစ်ဦးက ပြောသည်။

"အမျိုးသားတစ်ယောက်၊ အမျိုးသမီး နှစ်ယောက် ဒဏ်ရာရတယ်။ အမျိုးသား တစ်ယောက်က  စိုးရိမ်ရတယ်လို့သိရပါတယ်။ အမျိုးသမီး ၂ယောက် မှာ ၁ ယောက်က ခါးထိတယ်၊ နောက်တစ်ယောက်က ခေါင်းထိတယ်။ ယာဉ်သုံးစီးဆင့်တိုက်တာက ကမ်းနားလမ်းနဲ့ စာတိုက်ထောင့်မှာဖြစ်ပါတယ်"ဟု ယင်းက ပြောသည်။

အဆိုပါယာဉ်တိုက်မှုဖြစ်စဉ်မှ ထိခိုက်ဒဏ်ရာရရှိသူ (၃)ဦးကို ရောင်စဉ်မဲ့လူမှုကူညီရေးအသင်းက မြေပြင်ကုသမှုပေးပြီး ရန်ကုန်ပြည်သူ့ဆေးရုံကြီးသို့ပို့ဆောင်ပေးခဲ့ကြောင်း သိရသည်။