မြူနစ် (NSS) - အောက်တိုဘာ ၂၂

ရန်ကုန်မြို့ရှိ ဒဂုံစင်တာအနီးတစ်ဝိုက်၌ ကျောင်းသားလူငယ်များအား ပစ်မှတ်ထား၍ ခါးပိုက်နှိုက်လုယက်နေသောအဖွဲ့ကို ရဲတပ်ဖွဲ့က ဖမ်းဆီးထိန်းသိမ်းလိုက်ကြောင်း သတင်းရရှိသည်။

အဆိုပါခါးပိုက်နှိုက်အဖွဲ့ကို ယမန်နေ့(အောက်တိုဘာလ ၂၁ ရက်)တွင် ရန်ကုန်တိုင်း၊ စမ်းချောင်းမြို့နယ်အတွင်း၌ပင် ရဲတပ်ဖွဲ့ဝင်များက ဝိုင်းဝန်ဖမ်းဆီးခဲ့ခြင်းဖြစ်ကြောင်း ရဲတပ်ဖွဲ့ဝင်တစ်ဦးက NSS ကိုပြောသည်။

“မနေ့ကပဲ ခါးပိုက်နှိုက်အဖွဲ့က (၄)ယောက်ကို ဖမ်းမိတာ။ စမ်းချောင်းရဲစခန်းမှာ ဖမ်းထားတယ်။ သူတို့က မြေနီကုန်း၊ မဟာမြိုင်၊ ဒဂုံစင်တာ၊ စမ်းချောင်း အဲဒီအနီးတစ်ဝိုက်မှာ လှုပ်ရှားခါးပိုက်နှိုက်ကြတာပေါ့။ အဲဒီအဖွဲ့နဲ့ပတ်သက်လို့လည်း ၁၉၉ က တစ်ဆင့် ဖုန်းဆက်တိုင်တာတွေလည်း ရှိပါတယ်။ အဲဒါကြောင့် နယ်မြေဆင်းပြီးတော့ စုံစမ်းဖမ်းဆီးခဲ့တာပါ” ဟု အထက်ပါ ရဲတပ်ဖွဲ့ဝင်က ပြောသည်။

အထက်ပါနေရာများတွင် လှုပ်ရှားနေသော ခါးပိုက်နှိုက်အဖွဲ့သည် ကျောင်းသား၊ ကျောင်းသူလူငယ်များကို အဓိကပစ်မှတ်ထားကာ ခါးပိုက်နှိုက်နေခြင်းဖြစ်ကြောင်း ကြားသိရသည်။

အလားတူ ရန်ကုန်မြို့အတွင်း ပြေးဆွဲနေသည့် ခရီးသည်တင် YBS ကားများပေါ်တွင် အုပ်စုဖွဲ့ ခါးပိုက် နှိုက်သည့်ဖြစ်စဉ်များ မကြာခဏ ဆိုသကဲ့သို့ ဖြစ်ပွားလျက်ရှိနေသည့်အပြင် တစ်ခါတစ်ရံ ရန်ပြုတိုက်ခိုက်မှုများပင်ရှိကြောင်းသိရသည်။

“ခါးပိုက်နှိုက်တဲ့ဖြစ်စဉ်တွေက မကြာခဏဆိုသလို ကြားရတယ်။ ဖုန်းပါသွားပြန်ပြီ၊ ပိုက်ဆံအိတ် ပါသွားပြန်ပြီဆိုပြီးတော့ ခဏခဏ ကြားရတယ်။ ဘတ်စ်ကားပဲ စီးနေတဲ့သူဆိုတော့ ဒီကာလအတော်လေး သတိထားရတယ်။ ကားတွေပေါ် အုပ်စုဖွဲ့တက်လာပြီးတော့ နှိုက်တာဆိုတော့လေ။ အဓိကတော့ သေချာစီမံချက်ချပြီး ထိထိရောက်ရောက် အရေးယူပေးစေချင်ပါတယ်”ဟု YBS စီးနင်းသူတစ်ဦးက NSS ကိုပြောသည်။

လွန်ခဲ့သော ၂၀၂၂ ခုနှစ် ဒီဇင်ဘာလတွင် ရန်ကုန်မြို့ရှိ YBS ခရီးသည်တင်ကားများပေါ်၌ အုပ်စုဖွဲ့ကာ ခါးပိုက်နှိုက်မှု၊ လုယက်မှုများ ကျူးလွန်နေသော လူ(၆)ဦးပါအဖွဲ့ကို ဖမ်းဆီးအရေးယူနိုင်ခဲ့ကြောင်း နစက၏ထုတ်ပြန်ချက်များအရ သိရသည်။