Pearl (NSS) - အောက်တိုဘာ ၁၇

တရုတ်နိုင်ငံ၊ အမျိုးသားဖွံ့ဖြိုးတိုးတက်ရေးနှင့် ပြုပြင်ပြောင်းလဲရေးကော်မရှင်၏ ဖိတ်ကြားမှုအရ  ရပ်ဝန်း နှင့်ပိုးလမ်းမ အပြည်ပြည်ဆိုင်ရာပူးပေါင်းဆောင်ရွက်ရေးဖိုရမ်သို့ တက်‌ရောက်ရန် ဗိုလ်ချုပ်ကြီးမြထွန်းဦး တရုတ်နိုင်ငံသို့ သွားရောက်ခဲ့ကြောင်း သတင်းရရှိသည်။ 

နစကအဖွဲ့ဝင်၊ ပို့ဆောင်ရေးနှင့်ဆက်သွယ်ရေးဝန်ကြီး ဗိုလ်ချုပ်ကြီးမြထွန်းဦး ခေါင်းဆောင်သောကိုယ်စားလှယ်အဖွဲ့သည် ယမန်နေ့ (အောက်တိုဘာလ ၁၆ ရက်) ၊နံနက်ပိုင်းတွင်  ရန်ကုန်လေဆိပ်မှ တဆင့် တရုတ်နိုင်ငံသို့ သွားရောက်ခဲ့ကြောင်း သိရသည်။

တတိယအကြိမ်ရပ်ဝန်းနှင့်ပိုးလမ်းမအပြည်ပြည်ဆိုင်ရာပူးပေါင်းဆောင်ရွက်ရေးဖိုရမ်ကို တရုတ်နိုင်ငံ၊ ပေကျင်းမြို့၌ ယနေ့ (အောက်တိုဘာလ ၁၇ ရက်) မှ ၁၈ ရက်အထိ  ကျင်းပပြုလုပ်မည်ဖြစ်ကြောင်း သိရသည်။ 

အဆိုပါဖိုရမ်သို့ ဗိုလ်ချုပ်ကြီးမြထွန်းဦးနှင့်အတူ ဝန်ကြီး ဦးကိုကိုလှိုင်၊ စက်မှုဒုတိယဝန်ကြီး ဦးရင်မောင်ညွန့်အပါအဝင် အခြားတာဝန်ရှိသူများ လိုက်ပါသွားခဲ့ကြောင်း နစကမှ သတင်းထုတ်ပြန်ထားသည်။

ပြီးခဲ့သောရက်ပိုင်းအတွင်း နေပြည်တော်၌ ကျင်းပခဲ့သော NCA (၈)နှစ်ပြည့်အခမ်းအနားတွင် တရုတ်နိုင်ငံကိုယ်စားတတ်ရောက်လာသည့် အာရှရေးရာအထူးကိုယ်စားလှယ် မစ္စတာ တိန့်ရှီးကျွင်းက "Belt and Road" အတူတကွတည်ဆောက်ရေးကိုလည်း အရှိန်မြှင့်တင်ကာ တရုတ်-မြန်မာ အသိုက်အဝန်း  ကို ဆက်လက်ဖော်ဆောင်သွားမည်ဟု ပြောကြားခဲ့သည်။

"တရုတ်နိုင်ငံက မြန်မာနိုင်ငံရဲ့ယုံကြည်ရသော ပူးပေါင်းဆောင်ရွက်မှု မိတ်ဖက်အဖြစ် ဆက်လက်ဆောင် ရွက်ပြီး နှစ်ဦးနှစ်ဖက် ချစ်ကြည်ရင်းနှီးစွာဆက်ဆံရေးကို တိုးမြှင့်သွားလိုပါတယ်။ ဒါ့ပြင် "Belt and Road" အတူတကွတည်ဆောက်ရေးကိုလည်း အရှိန်မြှင့်တင်ပြီး တရုတ်-မြန်မာ အေးအတူပူအမျှအသိုက်အဝန်း အနှစ်သာရကိုလည်း အဆက်မပြတ်ပြည့်ဝလာစေရန် ဆောင်ရွက်သွားလိုပါတယ်" ဟု  မစ္စတာ တိန့်ရှီးကျွင်းက ပြောသည်။