NSS အောက်တိုဘာ ၁၄

ရေကြီးမှုကြောင့်  ယာယီရပ်ဆိုင်းခဲ့သည့် မော်လမြိုင်-ရန်ကုန် ခရီးစဉ်များကို အောက်တိုဘာ ၁၅ ရက်မှ စတင်ကာ  ပုံမှန်အတိုင်း ပြန်လည်ပြေးဆွဲသွားမည်ဟု မော်လမြိုင်ဘူတာကြီးမှ သိရသည်။ 

ပဲခူးလမ်းပိုင်းအတွင်းရေတိုက်စားထားသည့် ရထားလမ်းပိုင်းများ ပြန်လည်ပြင်ဆင်ထားပြိးဖြစ်သောကြောင့်   မော်လမြိုင်-ရန်ကုန်ရထားခရီးစဉ်များပုံမှန်အတိုင်းပြန်လည် ပြေးဆွဲမည်ဖြစ်ရာ ကြိုတင်လတ်မှတ်များ ရောင်းချနေပြီဟု သိရသည်။

ရိုရိုးတန်း အထက်တန်း တစ်ရက်ကြိုလက်မှတ်များကို မော်လမြိုင်ဘူတာကြီး ရက်ကြို လက်မှတ်ရုံတွင် ယနေ့ အောက်တိုဘာ ၁၄  နံနက် (ဝ၉းဝဝ) နာရီ အချိန်မှ စတင်ရောင်းချ ပေးနေပြီဖြစ်ပြီး အထက်တန်း(၃)ရက်ကြို၊ (၂)ရက်ကြိုတင် လက်မှတ်များကိုလည်း ရက်ကြို လက်မှတ်ရုံတွင် ရောင်းချပေးလျက်ရှိကြောင်းသိရသည်။ 

အမှတ် (၈၂) အစုန် မော်လမြိုင်-ရန်ကုန်ရထားသည် မော်လမြိုင်ဘူတာ မှ နံနက် (ဝ၈း၃ဝ) နာရီတွင် စတင်ထွက်ခွာဖြစ်ပြီး ရန်ကုန်သို့ ညနေ (ဝ၆းဝဝ) တွင် ဆိုက်ရောက်မည်ဟု ထုတ်ပြန်ကြေငြာထားသည်။

ပြီးခဲ့သည့် အောက်တိုဘာ ၈ ရက်၊ နံနက်ပိုင်းမှစတင်၍ ပဲခူးတိုင်းအတွင်း မိုးသည်းထန်စွာရွာသွန်းမှုဖြစ်ပွားခဲ့ပြီး ရန်ကုန် - မန္တလေးလမ်းပိုင်းရှိ ပဲခူးဘူတာနှင့် ရွှေလှေဘူတာအကြား နှင့် ပဲခူး-မော်လမြိုင်လမ်းပိုင်းရှိ ပဲခူးဘူတာ-ကလိဘူတာနှင့် နောင်ပတ္တရားဘူတာအကြားတို့တွင် ရထားလမ်းပေါ် ရေကျော်မှုများဖြစ်ပွားခဲ့ခြင်းဖြစ်သည်။