NSS - အောက်တိုဘာလ ၁၄

တနင်္သာရီတိုင်း၊ တနင်္သာရီမြို့နယ်ရှိ ပြည်ထောင်စုလမ်းမကြီးတွင် “မြတ်မန္တလာထွန်း” ခရီးသည်တင်ကားအား PDF အဖွဲ့မှ မိုင်းဆွဲတိုက်ခိုက်ခဲ့ကြောင်း လုံခြုံရေးအဖွဲ့နှင့် နီးစပ်သူများထံမှ သိရသည်။

ဖြစ်စဉ်မှာ ယမန့်နေ(အောက်တိုဘာလ ၁၃ ရက်) နံနက်ပိုင်းတွင် တနင်္သာရီမြို့နယ်၊ လယ်တောင်ယာကျေးရွာနှင့် တမုတ်ချုံးကျေးရွာ အကြားရှိ ပြည်ထောင်စုလမ်းမကြီးပေါ်တွင် အထက်ပါကဲ့သို့ဖြစ်ပွားခဲ့ကြောင်း သိရသည်။

အဆိုပါလမ်းမပေါ်တွင် “မြတ်မန္တလာထွန်း” ခရီးသည်တင်ကားသည် မြိတ်မြို့မှ စတင်ထွက်ခွာမောင်းနှင်လာစဉ် အထက်ပါနေရာအရောက်၌ PDF အဖွဲ့မှ မိုင်းဆွဲတိုက်ခိုက်ခဲ့ခြင်းဖြစ်ကြောင်း သိရသည်။

ထိုသို့ မိုင်းဆွဲတိုက်ခိုက်ခံရမှုကြောင့် ကားပေါ်တွင် လိုက်ပါလာသည့် လူ(၆)ဦးမှာ ထိခိုက်ဒဏ်ရာများ မရရှိခဲ့သော်လည်း ၎င်းကား၏ ရှေ့လေကာမှန်နှင့် ဘယ်ဘက်ရှိ ဘေးမှန်(၄)ချက်ခန့် ပျက်စီးဆုံးရှုံးသွားခဲ့ကြောင်း အထက်ပါသတင်းရင်းမြစ်၏ ပြောပြချက်အရ သိရသည်။

အထက်ပါမိုင်းဆွဲတိုက်ခိုက်မှုတွင် ပါဝင်ပတ်သက်သူများအား ဖော်ထုတ်ဖမ်းဆီးအရေးယူနိုင်ရေးအတွက် လုံခြုံရေးတပ်ဖွဲ့ဝင်များနှင့် သက်ဆိုင်ရာမှ စုံစမ်းရှာဖွေမှုများပြုလုပ်လျက်ရှိကြောင်း သိရသည်။