သန့်ဇင်(NSS) - အောက်တိုဘာ ၉

ရန်ကုန်တိုင်း၊ သင်္ဃန်းကျွန်းမြို့နယ်တွင် ငွေကျပ်သိန်း(၁၂၀၀)တန်းဖိုးရှိ စိတ်ကြွရူးသွပ်ဆေးပြား (၁၂၀၀၀၀)ဖမ်းဆီးရမိခဲ့ကြောင်း မြန်မာနိုင်ငံ မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ သတင်းထုတ်ပြန်ထားသည်။

၎င်း စိတ်ကြွရူးသွပ်ဆေးပြားများကို အောက်တိုဘာလ ၆ရက်၊ ညနေ ၆နာရီ ၅၀မိနစ်အချိန်တွင် သင်္ဃန်းကျွန်းမြို့နယ်၊ သုဝဏ္ဏ(၂၉) ရပ်ကွက်၊ ပေါ်ဆန်းမွှေးလမ်းတွင် ဖမ်းဆီးရမိခဲ့ကြောင်း သိရသည်။

အဆိုပါလမ်းပေါ်တွင် ဇော်အေးနောင်(ခ)နောင်နောင်(၃၆)နှစ် မောင်းနှင်လာပြီး မောင်ဦးမျိုးမင်း(ခ)မျိုးမင်းဇော်(၃၅)နှစ်လိုက်ပါလာသည့် ဆိုင်ကယ်အား စစ်ဆေးရှာဖွေခဲ့ရာ ဆိုင်ကယ်ခွကြားတွင် သယ်ဆောင်လာသော လက်ဆွဲအိတ်အတွင်းမှ ငွေကျပ်သိန်း(၃၀၀)တန်ဖိုးရှိ စိတ်ကြွရူးသွပ်ဆေးပြား (၃၀၀၀၀)နှင့် လက်ကိုင်ဖုန်း(၂)လုံးကို သိမ်းဆည်းရမိခဲ့ကြောင်း သိရသည်။

ထို့နောက် ဆက်လက်စစ်ဆေးချက်အရ ည ၇နာရီခွဲအချိန်တွင် ၎င်းတို့နေ ထိုင်သည့် သင်္ဃန်းကျွန်းမြို့နယ်၊ သုဝဏ္ဏ(၂၉)ရပ်ကွက်၊ မီးဒုံး(၁) လမ်းရှိ နေအိမ်အတွင်းမှ ငွေကျပ်သိန်း(၉၀၀)ကျော်တန်ဖိုးရှိ စိတ်ကြွရူးသွပ်ဆေးပြား (၉၀၀၀၀)အား ထပ်မံ သိမ်းဆည်းရမိခဲ့ကြောင်း သိရသည်။

ထို့ကြောင့် ၎င်းတို့(၂)ဦးအား သုဝဏ္ဏနယ်မြေရဲစခန်းတွင် မူးယစ်ဆေးဝါးနှင့် စိတ်ကိုပြောင်းလဲစေသောဆေးဝါးများဆိုင်ရာဥပဒေအရ အမှုဖွင့်အရေးယူထားရှိပြီး ကွင်းဆက်များအားဖော်ထုတ်လျက်ရှိကြောင်း မြန်မာနိုင်ငံမူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ သတင်းထုတ်ပြန်ထားသည်။