မြူနစ် (NSS) - အောက်တိုဘာ ၉

ရန်ကုန်တိုင်း၊ သင်္ဃန်းကျွန်းမြို့နယ်ရှိ Max ဆီဆိုင်အနီး၌ လက်လုပ်ဗုံး (၁)လုံးတွေ့ရှိခဲ့၍ လုံခြုံရေးအဖွဲ့က ဖောက်ခွဲရှင်းလင်းပေးခဲ့ကြောင်း သတင်းရရှိသည်။

အဆိုပါလက်လုပ်ဗုံးကို ယနေ့(အောက်တိုဘာလ ၉ ရက်)၊ နံနက် ၇ နာရီအချိန်တွင် သင်္ဃန်းကျွန်းမြို့နယ်၊ သုဝဏ္ဏ (၂၉)ရပ်ကွက်၊ သံသုမာလမ်း၊ သုဝဏ္ဏပန်းခြံထောင့်ရှိ Max ဆီဆိုင်ဘေး အမှိုက်ပုံးအနီးတွင်တွေ့ရှိခဲ့ခြင်းဖြစ် ကြောင်း လုံခြုံရေးအဖွဲ့ နှင့်နီးစပ်သူများထံမှ သိရသည်။

Max ဆီဆိုင်အနီး၌ မသင်္ကာဖွယ်ရာအထုပ်တစ်ခုအား တွေ့ရှိရသည့်အတွက် သက်ဆိုင်ရာလုံခြုံရေးအဖွဲ့များ သွားရောက်စစ်ဆေးစဉ် လက်လုပ်ဗုံးကို တွေ့ရှိခဲ့ခြင်းဖြစ်ကြောင်း သိရသည်။

၎င်းလက်လုပ်ဗုံးအား Key Pad ဖုန်းဖြင့်တွဲလျက် အရှည်(၇)လက်မခန့်ရှိသော သံပိုက်ဖြင့်ပြုလုပ်ထားခြင်းဖြစ်ကြောင်း သိရသည်။

ထို့နောက် လက်လုပ်ဗုံးအား သုဝဏ္ဏပန်းခြံရှေ့ သံသုမာလမ်းမအလယ်သို့ ပြောင်းရွှေ့ကာ သက်ဆိုင်ရာလုံခြုံရေးအဖွဲ့က ဖောက်ခွဲရှင်းလင်းပေးခဲ့ကြောင်း သိရသည်။