Pika (NSS) - အောက်တိုဘာ ၂ 

မန်ယူအသင်းနောက်တန်းကစားသမား မာတီနက်ဇ်သည် ၎င်း၏ ခြေဖဝါးဒဏ်ရာကို ဒုတိယအကြိမ် ခွဲစိတ်ကုသမှု များ လုပ်ဆောင်ရမည်ဖြစ်ပြီး လာမည့်နှစ်အထိ မန်ယူအသင်းပွဲစဉ်များတွင် ပါဝင် မကစားရနိုင်ဖွယ်ရှိနေကြောင်း သိရသည်။ 

မာတီနက်ဇ်သည် ခြေဖဝါးဒဏ်ရာကို ခွဲစိတ်ကုသမှုများခံယူပြီးလျှင် အချိန်(၃)လခန့် အနားယူရမည်ဖြစ်ကြောင်းလည်း သိရသည်။ မာတီနက်ဇ်သည် ပြီးခဲ့သည့် ဧပြီလက ဆီဗီလာအသင်းနှင့်ကစားခဲ့သော ယူရိုပါလိဂ်ပွဲစဉ်တွင် ရရှိခဲ့သည့် ညာဖက်ခြေဖဝါးဒဏ်ရာကို ပထမအကြိမ် ခွဲစိတ်ကုသပြီးနောက် ၂ဝ၂၂-၂ဝ၂၃ ပရီးမီးယားလိဂ်ရာသီတွင် (၂)လနီးပါးကြာ အနားယူခဲ့ရကြောင်းလည်း သိရသည်။

မာတီနက်ဇ်သည် မန်ယူအသင်း၏ ရာသီကြိုပွဲစဉ်များတွင် ပြန်လည်ပါဝင်ကစားခဲ့သော်လည်း  အာဆင်နယ် အသင်းကို (၃)ဂိုး-(၁)ဂိုးဖြင့် ရှုံးနိမ့်ခဲ့သည့် စက်တင်ဘာလ(၃)ရက်က ကစားခဲ့သော ပရီးမီးယားလိဂ်ပွဲတွင် ဒဏ်ရာ က ပြန်နာလာသောကြောင့် လူစားလဲခဲ့ရကြောင်း သိရသည်။

မာတီနက်ဇ်သည် ဘရိုက်တန်အသင်းနှင့်ကစားခဲ့သော ပရီးမီးယားလိဂ်ပွဲနှင့် ဘိုင်ယန်မြူးနစ်အသင်း နှင့် ကစားခဲ့ သော ချန်ပီယံလိဂ်ပွဲစဉ်တို့တွင် ပြန်လည်ကစားခဲ့ပြီးနောက် ခြေဖဝါးဒဏ်ရာက ပိုဆိုးလာခြင်းဖြစ်ကြောင်း သိရသည်။ 

သို့သော်လည်း မာတီနက်ဇ်၏ ညာဖက်ခြေဖဝါးဒဏ်ရာကို ပြန်လည်ကောင်းမွန်လာစေရန်အတွက် ဒုတိယကြိမ် ခွဲစိတ်ကုသမှုလုပ်ဆောင်ခြင်းက အကောင်းဆုံးဖြစ်မည်ဟု မန်ယူအသင်းဆေးအဖွဲ့က ဆုံးဖြတ်ချက်ချခဲ့ကြောင်း သိရသည်။