စော(NSS) - အောက်တိုဘာ ၂

နေပြည်တော်မှလွဲ၍ တိုင်းနှင့်ပြည်နယ်အားလုံးတွင် မြေမြှုပ်မိုင်းကြောင့် အရပ်သား ထိခိုက်သေဆုံးမှုများ ဖြစ်ပေါ်နေကြောင်း သိရသည်။

ကုလသမဂ္ဂလူသားချင်းစာနာထောက်ထားမှုဆိုင်ရာညှိနှိုင်းရေးရုံးက အောက်တိုဘာလ ၁ ရက်တွင် အထက်ပါကဲ့သို့ အသိပေးထုတ်ပြန်ထားခြင်းဖြစ်သည်။

မြန်မာနိုင်ငံ၏လူဦးရေ (၂)သန်းနီးပါးသည် မရေရာသောအခြေအနေများဖြင့် နေရပ်စွန့်ခွာတိမ်းရှောင်နေရပြီး ကယ်ဆယ်ရေးအကူအညီများလိုအပ်လျက်ရှိကြောင်း UNOCHA ထုတ်ပြန်ထားသည်။

ထို့ပြင် ပေါက်ကွဲစေတတ်သော ပစ္စည်းများသည် အရပ်သားများအပေါ်  ခြိမ်းခြောက်မှုများ ပျံ့နှံလာပြီး နေပြည်တော်မှလွဲ၍ တိုင်းနှင့်ပြည်နယ်အားလုံးတွင် မြေမြှုပ်မိုင်းကြောင့် အရပ်သား ထိခိုက်သေဆုံးမှုများ ဖြစ်ပေါ်လျက်ရှိကြောင်း ထုတ်ပြန်ထားသည်။

မြန်မာနိုင်ငံတွင် မြေမြှုပ်မိုင်း နှင့် အခြားပေါက်ကွဲစေသည့် စစ်လက်နက်ပစ္စည်းများကြောင့် သေဆုံးဒဏ်ရာရရှိသူများအနက် သုံးပုံတစ်ပုံကျော်သည် ကလေးငယ်များဖြစ်ကြောင်း သိရသည်။

အလားတူ ပြီးခဲ့သည် ၂၀၂၂ ခုနှစ်တွင် မြန်မာနိုင်ငံအတွင်း၌ မြေမြှုပ်မိုင်း နှင့် အခြာပေါက်ကွဲစေသည့် စစ်လက်နက်ပစ္စည်းများကြောင့် သေဆုံးဒဏ်ရာရရှိသူ (၃၉၀)ဦးရှိပြီး ၂၀၂၁ ခုနှစ်တွင် သေဆုံးထိခိုက်ဒဏ်ရာရရှိသူ (၂၈၄)ဦးရှိခဲ့ကြောင်း သိရသည်။