စော (NSS) - စက်တင်ဘာ ၂၉

အလုပ်သမားဝန်ကြီးဌာန၊ အလုပ်ရုံနှင့် အလုပ်သမားဥပဒေစစ်ဆေးရေး ဦးစီးဌာနတွင် လစ်လပ်လျက်ရှိနေသော ရာထူးနေရာ (၅၃)နေရာအတွက် ဝန်ထမ်းများ ခေါ်ယူနေကြောင်း သိရသည်။

အလုပ်ရုံနှင့် အလုပ်သမားဥပဒေစစ်ဆေးရေး ဦးစီးဌာနမှ ယနေ့(စက်တင်ဘာလ ၂၉ ရက်)ထုတ် နိုင်ငံပိုင် သတင်းစာများတွင် အထက်ပါကဲ့သို့ ကြေညာထားခြင်းဖြစ်သည်။

အလုပ်ရုံ နှင့် အလုပ်သမားဥပဒေစစ်ဆေးရေး ဦးစီးဌာနတွင် အငယ်တန်းစာရေးရာထူးအတွက်  (၄၅)နေရာ၊ ယာဉ်မောင်း (၅) ရာထူးအတွက် (၃)နေရာ၊ ရုံးအကူရာထူးအတွက် (၅)နေရာကို ခေါ်ယူသွားမည်ဖြစ်ကြောင်း ထုတ်ပြန်ချက်အရ သိရသည်။

အထက်ပါရာထူးအတွက် လျှောက်လွှာများအား ယခင်က စက်တင်ဘာလ (၂၉)ရက်တွင် နောက်ဆုံးထား လျှောက်ထားရမည်ဖြစ်ကြောင်း ထုတ်ပြန်ထားသော်လည်း ယခုတွင် အောက်တိုဘာ(၂၇)ရက်အထိ လျှောက်ထား နိုင်ကြောင်း ထုတ်ပြန်ထားသည်။

လျှောက်ထားများအနေဖြင့် အငယ်တန်းရာထူးအတွက်  နိုဝင်ဘာ(၁၈)ရက်တွင် အထွေထွေဗဟုသုတနှင့် အင်္ဂလိပ်စာကို ဖြေဆိုရမည်ဖြစ်ပြီး နိုဝင်ဘာ (၁၉)ရက်တွင် ကွန်ပျူတာစစ်ဆေးခြင်းနှင့် လူတွေ့စစ်ဆေးခြင်းကို ဖြေဆိုရမည်ဖြစ်ကြောင်း သိရသည်။

ထို့ပြင် ယာဉ်မောင်းနှင့် ရုံးအကူရာထူးအား လျှောက်ထားသူများသည် နိုဝင်ဘာ (၁၉)ရက်တွင် လူတွေ့စစ်‌ဆေး သွားမည်ဖြစ်ကြောင်း သိရသည်။  

အရည်အချင်းစစ်စာမေးပွဲကို နေပြည်တော်၊ ရန်ကုန်၊ မန္တလေး၊ မွန်ပြည်နယ်နှင့် ရှမ်းပြည်နယ်၊ ဝန်ကြီးဌာန၊ အလုပ်ရုံနှင့် အလုပ်သမားဥပဒေစစ်ဆေးရေးဦးစီးဌာန၊ ရုံးအမှတ် (၅၁)တွင် ဖြေဆိုရမည်ဖြစ်ကြောင်း သိရသည်။