NSS - စက်တင်ဘာ ၃ဝ

ပြည်တွင်းမှ တရုတ်ဈေးကွက်သို့ ဖရဲသီးများတင်ပို့ခဲ့ရာတွင် ယခုနှစ်၌ ဖရဲသီးတန်ချိန် တစ်သိန်းကျော် တင်ပို့နိုင်ခဲ့ကြောင်း သစ်သီး၀လံကုန်စည်ဒိုင်(မူဆယ်) မှ သိရသည်။

၂ဝ၂၃ ခုနှစ် ဇန်နဝါရီလမှ ဩဂုတ်လကုန်ထိ ၈ လတာအတွင်း  မူဆယ်နယ်စပ်ကုန်သွယ်ရေးမှ တရုတ်ဈေးကွက်သို့ ဖရဲသီးတန် ချိန် ၁၁၃ဝဝဝ ကျော်ကို ကုန်တင်ယာဉ် အစီးရေ ၇ဝဝဝ ကျော် တင်ပို့ခဲ့ခြင်းဖြစ်သည်။

“ဖရဲသီးကို ပြည်တွင်းကနေ တရုတ်ဘက်တင်ပို့ရာမှ လက်ရှိအခြေအနေအရ ဈေးကွက်က မကောင်းဘူး။ ဘာလို့လဲဆိုတော့ တရုတ်ဘက်ကလည်း ဖရဲသီးတွေ အထွက်များနေတာကြောင့် ကျွန် တော်တို့ဘက်က ဖရဲသီးက ဈေးကောင်းမရတာဖြစ်ပါတယ်” ဟု  (မူဆယ်)ဖရဲသီးပွဲရုံတစ်ခုမှ ပြောသည်။

ပြည်တွင်း၌ နိုဝင်ဘာမှ ဇူလိုင်လအတွင်း ဖရဲသီးလှိုင်လှိုင် ထွက်ပေါ်ချိန်ဖြစ်၍ ထိုအချိန်၌ တရုတ်ဈေးကွက်တွင် ဈေးကောင်း ရရှိခဲ့သော်လည်း ငွေဈေးအပေါ် မူတည်၍ ဈေးနှုန်းအပြောင်းအလဲရှိကြောင်း တရုတ်ဘက်သို့ တင်ပို့ ရာတွင် ဝန်ဆောင်ခနှင့် စစ်ဆေးခများမှာ ယွမ် ၉ဝဝ ဝန်းကျင်    ကျသင့်ပြီး အကောက်ခွန်ကြေး မပါဝင်သေး ကြောင်း သိရသည်။

“လက်ရှိမှာ စက်သုံးဆီဈေး နဲ့ တခြားစရိတ်တွေက ကုန်ကျမှုများပြားလို့ မူဆယ်အရောက်ဆိုရင် ဖရဲသီးတစ်တန်ကို ကုန်ကျစရိတ်များတယ်။ ဖရဲသီးအရည် အသွေးကောင်းပြီး ဈေးကွက်ကောင်းမှ တင်ပို့သူတွေမှာ နည်း နည်းပဲမြတ် တယ်။ အဲဒီလိုမဟုတ်ရင် အရှုံးနဲ့ ရင်ဆိုင်ရတယ်” ဟု ဖရဲသီးကုန်သည်တစ်ဦးက ပြောသည်။

တရုတ်ဘက်တွင်လည်း ဖရဲသီးများ စိုက်ပျိုးထုတ်လုပ်လျက်ရှိရာ ယခုအချိန်၌ ၎င်းတို့စိုက်ပျိုးသည့် ဖရဲသီးများ လှိုင်လှိုင် ပေါ်ချိန်ဖြစ်၍ ဝယ်လက်များက  ပြည်တွင်းမှ တင်ပို့သော ဖရဲသီး များကို လာဝယ်သူမရှိသလောက် နည်းပါးနေကြောင်း၊ လက်ရှိတွင်  ပြည်တွင်း၌ ကျောက်စိမ်းဖရဲသီး များ စတင်ထွက်ပေါ်နေပြီး တရုတ်ဘက်သို့ တင်ပို့လျက်ရှိကြောင်း  သိရသည်။

ပြည်တွင်းမှ ဖရဲသီးများသည် အောက်တိုဘာလကုန်မှစ၍ လှိုင်လှိုင်ထွက်ပေါ်မည်ဖြစ်ပြီး နောက်နှစ်အထိ တင်ပို့ နိုင်မည်ဖြစ်သည်။ တရုတ်ဈေးကွက်သို့ အပြိုင်အဆိုင် ဝင်ရောက်လာမည်ဖြစ်ရာ အရည်အသွေးကောင်းမွန်သော ဖရဲသီးများ တင်ပို့မှသာ ဈေးကောင်းရရှိ နိုင်မည်ဟု ဆိုသည်။