NSS - စက်တင်ဘာ ၂၈

အလုပ်ကောင်းရမည်ဟုဆိုကာ ငွေကြေးလိမ်လည်ခံခဲ့ရပြီး ဒုက္ခရောက်နေသည့် မလေးရှားနိုင်ငံရောက် မြန်မာအမျိုးသမီးအား မလေးရှားနိုင်ငံရှိ မြန်မာလူမှုကူညီရေးအသင်းက ကူညီခေါ်ဆောင်ထားကြောင်း သိရသည်။

မြန်မာလူမှုကူညီရေးအသင်း(မလေးရှား)မှ ယမန်နေ့(စက်တင်ဘာလ ၂၇ ရက်)တွင် အထက်ပါကဲ့သို့ထုတ်ပြန်ထားခြင်းဖြစ်သည်။

အဆိုပါအမျိုးသမီးသည် မကွေးတိုင်း၊ မင်းဘူးမြို့တွင် နေထိုင်သူ ဒေါ်ပုတင်(၅၀)နှစ်ဖြစ်ပြီး မလေးရှားနိုင်ငံတွင် ငွေရှာရန်အတွက် မြန်မာငွေကျပ်သိန်း(၄၀)အား ပွဲစားကိုပေး၍ မလေးရှားနိုင်ငံသို့ တရားမဝင်ခိုးဝင်ခဲ့ကြောင်း သိရသည်။

၎င်းသည် သန့်ရှင်းရေးအလုပ်ကို စတင်လုပ်ကိုင်ခဲ့ပြီးနောက် မလေးရှားနိုင်ငံ၊ အီပို့မြို့ရှိ စားသောက်ဆိုင်တွင် နှစ်လနီးပါးအလုပ်လုပ်ခဲ့ပြီး အခက်အခဲများရှိခဲ့ခြင်းကြောင့် အွန်လိုင်းပွဲစားများနှင့် ချိတ်ဆက်ခဲ့ကြောင်း အထက်ပါအသင်းထံမှ သိရသည်။

ထို့နောက် စလန်းကောပြည်နယ်၊ ပူချွန်းမြို့သို့ ရောက်ရရှိခဲ့ရာ ပွဲစားက အလုပ်လိုချင်လျှင် ရင်းဂစ် (၇၀၀)ပေးမှသာ အလုပ်ကောင်းရမည်ဟုပြောဆိုခဲ့သဖြင့် အမျိုးသမီးသည် ၎င်းရင်းဂစ် (၇၀၀)ကို ပေးအပ်ခဲ့ကြောင်း အသင်း၏ ထုတ်ပြန်ချက်အရ သိရသည်။

သို့သော် အဆိုပါပွဲစားသည်  ဒေါ်ပုတင်အား ပူချွန်းမြို့၊ ပရီမာရပ်ကွက် ၊ “ဖူးကော့” စားသောက်ဆိုင်တွင် ထားခဲ့ပြီး (၅)ရက်ကြာမြင့်သည့်တိုင်အောင် ပေါ်မလာခဲ့သဖြင့် အခက်အခဲများစွာ ကြုံတွေ့ခဲ့ရကြောင်း သိရသည်။

ထို့ကြောင့် ၎င်းအား ဖူးကော့စားသောက်ဆိုင်မှ အလုပ်သမားများမှ ကူညီစောင့်ရှောက်ထားပြီး ယမန်နေ့(စက်တင်ဘာခ ၂၇ရက်)တွင် မြန်မာလူမှုကူညီရေးအသင်း(မလေးရှား)သို့ ဆက်သွယ်အကူအညီတောင်းခံလာကြောင်း ထုတ်ပြန်ထားသည်။

လက်ရှိတွင် ဒေါ်ပုတင်အား မြန်မာလူမှုကူညီရေးအသင်း(မလေးရှား)မှ ကူညီခေါ်ဆောင်ထားကြောင်း သိရသည်။