ဂျန်ဇက် (NSS) - စက်တင်ဘာ ၂၆ 

ထိုင်းဝန်ကြီးချုပ်ဟာ ထိုင်းရဲတပ်ဖွဲ့ ဒုတိယအကြီးအကဲဖြစ်သူ ရဲချုပ်ကြီး  Hakparn ရဲ့နေအိမ်ကို စီးနင်းရှာဖွေဖို့ ဆိုက်ဘာရဲတပ်ဖွဲ့က ဝင်ရောက်စီးနင်းခဲ့မှုနဲ့ပတ်သက်ပြီး စုံစမ်းရေးအဖွဲ့ ဖွဲ့စည်းဖို့ အမိန့်ပေးခဲ့ကြောင်း သိရပါတယ်။ 

ထိုင်းဝန်ကြီးချုပ်က စုံစမ်းစစ်ဆေးရေးကော်မတီမှာ ပါဝင်မယ့်သူအားလုံးဟာ တရားမျှတမှု ရှိရမှာဖြစ်ကြောင်း၊ စုံစမ်းရေးကော်မတီမှာ ပါဝင်မယ့်သူတွေကို ရဲတပ်ဖွဲ့ နဲ့ မဆက်နွယ်တဲ့ ပြင်ပ လူပုဂ္ဂိုလ်တွေကိုလည်း ထည့်သွင်း ဖွဲ့စည်းရမှာဖြစ်ကြောင်း သိရပါတယ်။

ထိုင်း ဆိုင်ဘာရဲတပ်ဖွဲ့ဝင် ၃ဝ ဦး ပါဝင်တဲ့အဖွဲ့ဟာ ပြီးခဲ့တဲ့ရက်ပိုင်းမှာ ထိုင်းရဲတပ်ဖွဲ့ ဒုတိယအကြီးအကဲဖြစ်သူ ရဲချုပ်ကြီး Surachate ရဲ့အိမ်ကို တရားရုံးဝရမ်းနဲ့အတူ စီးနင်းခဲ့ကြောင်း၊ ရဲချုပ်ကြီးဟာ တရားမဝင် အွန်လိုင်း လောင်းကစားမှုတွေမှာ ပါဝင်ဆက်နွယ်နေတယ်လို့ စွပ်စွဲခံနေရသူဖြစ်ကြောင်း ထိုင်းသတင်းတွေက ဖော်ပြပါ တယ်။ 

ထိုင်းဝန်ကြီးချုပ်က "ကျွန်တော်ဟာ ထိုင်းရဲတပ်ဖွဲ့အကြီးအကဲရဲချုပ် Kittiprapas နဲ့ ဆွေးနွေးခဲ့တယ်။ စုံစမ်း စစ်ဆေးရေးအဖွဲ့ ဖွဲ့စည်းစစ်ဆေးမှာပါ။ အဲဒီအဖွဲ့ထဲမှာ ထိုင်းရဲတပ်ဖွဲ့တာဝန်ရှိသူတွေအပြင် အခြားလူပုဂ္ဂိုလ်တွေ လည်း ပါဝင်ရမှာဖြစ်တယ်" လို့ ပြောပါတယ်။

ထိုင်းရဲတပ်ဖွဲ့ဒုတိယအကြီးအကဲဖြစ်သူက ၎င်းပိုင်ဆိုင်တဲ့အိမ်ခြောက်လုံးကို ဝင်ရောက်စီးနင်းတာက နိုင်ငံရေးဆန် တဲ့လှုပ်ရှားရည်ရွယ်မှုမျိုးဖြစ်ကြောင်း သိရပါတယ်။ ၎င်းဟာ လက်ရှိအချိန်မှာ ထိုင်းရဲတပ်ဖွဲ့အကြီးအကဲအဖြစ် တာဝန်ယူဖို့ အမည်စာရင်းတင်သွင်းခံရသူတွေထဲမှာ ပါဝင်နေသူဖြစ်ပါတယ်။ ထိုင်းရဲတပ်ဖွဲ့အကြီးအကဲအဖြစ် တာဝန်ယူနေတဲ့ ရဲချုပ်ကြီး Kittiprapas ဟာ လာမယ့်ရက်ပိုင်းအတွင်းမှာ ရာထူးကနေ အနားယူတော့မှာဖြစ် ကြောင်း သိရပါတယ်။ 

၎င်းက “တစ်ခုခုတော့ မမှန်ဘူး။ ကျွန်တော်အိမ်ကို ဝင်စီးနင်းခဲ့သူတွေဟာ တရားရုံးကို လှည့်စားကြတယ်။ ဒီအိမ် တွေကို တရားရုံးက မသိခဲ့ဘူး။ ဝရမ်းရှာတုန်းက လိပ်စာတွေသာ ပေးတဲ့အတွက် တရားရုံးက မသိရဘူး” လို့ ပြောပါ တယ်။