စော(NSS) - စက်တင်ဘာ ၂၆

နေပြည်တော်၊ ဇေယျာသီရိမြို့နယ်၌ စိတ်မနှံ့သူဟုယူဆရသည့် အမျိုးသားတစ်ဦး ကြိုးဆွဲချအဆုံးစီရင်ခဲ့ကြောင်း သိရသည်။

ဖြစ်စဉ်မှာ‌ ယမန်နေ့(စက်တင်ဘာလ ၂၅ရက်)၊ နံနက်(၃)နာရီဝန်းကျင်အချိန်တွင် ဇေယျာသီရိမြို့နယ်၊ မအူတောအုပ်စု၊ မအူတောကျေးရွာ၌ အထက်ပါကဲ့သို့ဖြစ်ပွားခဲ့ခြင်းဖြစ်ကြောင်း ကရုဏာရှင်လူမှုကူညီရေးပရဟိတအသင်းထံမှ သိရသည်။

“သူကစိတ်မနှံ့ဘူးဗျ၊ အရက်ကလည်းနည်းနည်းကြောင်တယ်လို့ မိသားစုကတော့ပြောပါတယ်။ သူ့ကို အိမ်အပေါ်ထပ်မှာ ငုတ်တုတ်ကြီး ကြမ်းပြင်ပေါ် ဒူးထောက်တဲ့ပုံစံနဲ့ တွေ့ခဲ့ပါတယ်။ အင်္ကျီလည်း မပါဘူး။ အောက်ပိုင်းလည်း ဘာမှမပါဘူး”ဟု ကရုဏာရှင်လူမှုကူညီရေးအသင်းမှတာဝန်ရှိသူတစ်ဦးက NSS ကိုပြောသည်။

သေဆုံးသူ အမျိုးသားသည် အသက် (၄၂)နှစ်အရွယ်ရှိ ကိုသူဖြစ်ပြီး ပြည်သူ့ဆေးရုံကြီး ကုတင်(၁၀၀၀)ရင်ခွဲရုံသို့ ပို့ဆောင်ထားကြောင်း သိရသည်။