Pearl (NSS) - စက်တင်ဘာ ၂၆

မန္တလေး၌ ကျောက်အမှုန့်အိတ်များစင်ပေါ်ထပ်ရာမှ စင်ပြိုကျပြီး အလုပ်သမား (၂)ဦးပိမိပြီး တစ်ဦးသေဆုံးသွားခဲ့ကြောင်း မဏိစလ လူမှုကူညီရေးအသင်းထံမှ သတင်းရရှိသည်။ 

ဖြစ်စဉ်မှာ ယနေ့ (စက်တင်ဘာလ ၂၆ ရက်)၊ နေ့လည် (၁၂) နာရီ အချိန်ခန့်တွင် ၊ ချမ်းမြသာစည်မြို့နယ် ၊ စစ်ကိုင်း - မန္တလေး လမ်းမပေါ်ရှိ ဂိုဒေါင်တစ်လုံးအတွင်း၌ ဖြစ်ပွားခဲ့ကြောင်း သိရသည်။ 

အဆိုပါ ဂိုထောင်အတွင်း၌ ကျောက်အမှုန်အိတ်များစင်ပေါ်ထပ်ရာမှ စင်ပြိုကျကာ အလုပ်သမား (၂)ဦး ပိမိခဲ့ပြီး တစ်ဦးသေဆုံး သွားခဲ့ကြောင်း သိရသည်။ 

"သူတိုက အဲဒီမှာ ကျောက်အိတ်တွေ စီနေတာ။ အလုပ်သမားက (၄/၅)ယောက်ပေါ့။  စင်က မနိုင်တော့ ပြိုကျတယ်။ နှစ်ဦးပိမိတာ တစ်ဦးဆုံးတယ်၊ တစ်ဦးခေါင်းကွဲတယ်"ဟု အထက်ပါ လူမှုကူညီရေးအသင်း၏ တာဝန်ရှိသူတစ်ဦးက NSS ကို ပြောသည်။

ဖြစ်စဉ်ကြောင့် သေဆုံးသူသည် အသက် (၁၉)နှစ်အရွယ် အမျိုးသားတစ်ဦးဖြစ်ပြီး လက်ရှိတွင် ၎င်းတို့အား မန္တလေးပြည်သူ့ဆေးရုံကြီးသို့ ပို့ဆောင်ပေးထားကြောင်း သိရသည်။