ဂျန်ဇက် (NSS) - စက်တင်ဘာ ၂၄ 

ဘရာဇီးသမ္မတ လူလာဒါဆေးဗားက စစ်ရေးဆောင်ရွက်ချက်များဟာ ယူကရိန်းပဋိပက္ခအဆုံးသတ်မယ့် အဖြေမျိုးမဟုတ်ကြောင်း သတိပေးပြောဆိုလိုက်ပါတယ်။ 

ဘရာဇီးသမ္မတဟာ ကုလသမဂ္ဂအထွေထွေညီလာခံကို တက်ရောက်လာချိန်မှာ ယူကရိန်းသမ္မတ ဇီလန်စကီးနဲ့တွေ့ဆုံချိန်အတွင်း အခုလိုမျိုးပြောခဲ့တာဖြစ်ပါတယ်။ 

ယူကရိန်း နဲ့ ရုရှားနိုင်ငံကြား ဖြစ်ပွားနေတဲ့စစ်ပွဲကို ငြိမ်းချမ်းစွာအဖြေရှာဖို့ကို ဘရာဇီးသမ္မတ နဲ့ ယူကရိန်းသမ္မတတို့ သဘောတူညီခဲ့ကြောင်း သိရပါတယ်။ ယူကရိန်းစစ်ပွဲကိုအဆုံးသတ်ဖို့ အကောင်းဆုံးနည်းလမ်းက တိုက်ပွဲတွေကို ရပ်တန့်ရမှာဖြစ်ကြောင်း ဘရာဇီးသမ္မတက ထပ်မံပြောဆိုခဲ့ပါတယ်။ 

ဘရာဇီးနိုင်ငံဟာ ရုရှားနဲ့တရုတ်တို့ ဦးဆောင်ပါဝင်နေတဲ့  BRICS အဖွဲ့မှာ ပါဝင်နေသူဖြစ်ပြီး၊ ရုရှားသမ္မတနဲ့နီးစပ်မှုရှိကာ စစ်ပွဲအဆုံးသတ်ရေးအတွက် ကြားဝင်စေ့စပ်ပေးဖို့ အဆိုပြုကမ်းလှမ်းခဲ့ဖူးသူဖြစ်ပါတယ်။

ဘရာဇီးသမ္မတက ၎င်းအနေနဲ့ ယူကရိန်းမှာ ငြိမ်းချမ်းရေးပြန်လည်ရရှိစေဖို့အတွက် ပူးပေါင်းကြိုးပမ်းမှုတွေမှာပါဝင်ဖို့ ဆန္ဒရှိနေကြောင်း ပြောပါတယ်။ ယူကရိန်းနဲ့ ရုရှားတို့ဟာ ၂ဝ၂၂ ခုနှစ် ဖေဖော်ဝါရီလမှာတိုက်ပွဲများ စတင်ဖြစ်ပွားလာခဲ့ပြီးနောက် တိုက်ပွဲများ ဆက်လက်ဖြစ်ပွားနေဆဲဖြစ်ကာ လက်ရှိအချိန်အထိ ငြိမ်းချမ်းရေးဆွေးနွေးနိုင်ခြင်းမရှိသေးကြောင်း သိရပါတယ်။ 

ယူကရိန်းဟာ ဇွန်လအစောပိုင်းမှာ သိမ်းပိုက်ခံထားရတဲ့နယ်မြေတွေကို ပြန်လည်သိမ်းယူနိုင်ဖို့ ရုရှားအပေါ် ကြီးမားတဲ့တန်ပြန်ထိုးစစ်ဆင်မှုတွေ ပြန်လည်လုပ်ဆောင်ခဲ့ပေမယ့် အောင်မြင်မှုမရဘဲ ရှိနေကြောင်း သိရပါတယ်။ 

ယူကရိန်းစစ်ပွဲမှာ အမေရိကန်ဦးဆောင်တဲ့အနောက်အုပ်စုဟာ ယူကရိန်းဘက်က ကူညီထောက်ပံ့ပေးနေပြီး စစ်ပွဲအဆုံးသတ်မှာ လိုလားမှုမရှိကြောင်း အစောပိုင်းကသတင်းတွေ ထွက်ပေါ်ခဲ့ပါတယ်။