Pearl (NSS) - စက်တင်ဘာ ၂၃

မေတ္တာညွန့်ဘူတာရုံအနီးတွင် ရထားလမ်းကူးလိုင်းကြိုးနိမ့်ကျနေသဖြင့် လိုင်းမြှင့်တင်ခြင်းဆောင်ရွက်မည်ဖြစ်၍ မြို့နယ်အချို့၌ ယာယီမီးပြတ်တောက်မည်ဖြစ်ကြောင်း YESC မှ အသိပေးထားသည်။

ရန်ကုန်လျှပ်စစ်ဓာတ်အားပေးရေးကော်ပိုရေးရှင်း (YESC) မှ ယနေ့ (စက်တင်ဘာလ ၂၃ရက်) ၊ နံနက် (၉)နာရီ အချိန်ခန့်တွင် အထက်ပါကဲ့သို့ အသိပေးထုတ်ပြန်ထားခြင်းဖြစ်သည်။

ရန်ကုန် (အရှေ့ပိုင်းခရိုင်)၊ မင်္ဂလာတောင်ညွန့်မြို့နယ်ရှိ 66kV သာကေတ-ပုသိမ်ညွန့်-ကျိုက္ကဆံဓာတ်အားလိုင်းသည် မေတ္တာညွန့်ဘူတာရုံအနီးတွင် ရထားလမ်းကူးလိုင်းကြိုးနိမ့်ကျလျက်ရှိကြောင်း YESC မှအသိပေးထားသည်။ 

ထို့ကြောင့် အဆိုပါရထားလမ်းကူးလိုင်းကြိုးနိမ့်ကျနေခြင်းအား လိုင်းမြှင့်တင်ခြင်းလုပ်ငန်းကို နံနက် (၁၁)နာရီမှ ညနေ(၃)နာရီ အချိန်အထိ ဆောင်ရွက်မည်ဖြစ်သဖြင့် အဆိုပါလုပ်ငန်းဆောင်ရွက်နေစဉ် အတွင်း ဗဟန်းမြို့နယ်၊ တာမွေမြို့နယ်၊ ရန်ကင်းမြို့နယ်၊ မင်္ဂလာတောင်ညွန့်မြို့နယ်နှင့် တောင်ဥက္ကလာပမြို့နယ်တို့၏ ရပ်ကွက်နေရာအချို့တို့တွင် ယာယီဓာတ်အားပြတ် တောက်မှုရှိမည်ဖြစ်ပါကြောင်း သိရသည်။ 

ဓာတ်အားပြတ်တောက်ချိန်ကြာမြင့်မှုမရှိစေရေး၊ ဓာတ်အားပြတ် ဧရိယာလျော့နည်းစေရေးအတွက် အလေးထား ဆောင်ရွက်သွားမည် ဖြစ်ကြောင်း YESC  မှ အသိပေးထုတ်ပြန်ထားသည်။