ယွန်း (NSS) - စက်တင်ဘာ ၂၁

လာမည့် ပွင့်လင်းရာသီကာလအတွင်း ပြည်တွင်း၊ ပြည်ပခရီးသွားဧည့်သည်များ ဦးစားပေးသွားရောက်လည်ပတ်သင့်သည့် ခရီးစဥ်ဒေသ(၁၄)ခုကို ထုတ်ပြန်ခဲ့ကြောင်း သိရသည်။

ဟိုတယ်နှင့်ခရီးသွားလာရေးဝန်ကြီးဌာနက ယနေ့(စက်တင်ဘာလ ၂၁ ရက်)တွင် အထက်ပါကဲ့သို့ အသိပေးဖော်ပြထားခြင်းဖြစ်သည်။

မြန်မာနိုင်ငံရှိ ရှေးဟောင်းယဥ်ကျေးမှုအမွေအနှစ်များဖြင့် ထင်ရှားကျော်ကြားသည့် သမိုင်းဝင်ဘုရား၊ စေတီပုထိုးများ၊ ရှေးဟောင်းအဆောက်အဦများနှင့် တောတောင်ရေမြေ သဘာဝအလှအပများအား လေ့လာကြည့်ရှုခံစားနိုင်ရန် ဦးစားပေးသွားရောက်လည်ပတ်သင့်သည့် ခရီးစဥ်ဒေသများကို ဝန်ကြီးဌာနမှ ထုတ်ပြန်ထားခြင်းဖြစ်သည်။

အဆိုပါ ခရီးစဥ်ဒေသ (၁၄)ခုတွင် နေပြည်တော်၊ ရန်ကုန်၊ မန္တလေး၊ ပုဂံ၊ ငွေဆောင်၊ ချောင်းသာ၊ ငပလီ၊ ပြင်ဦးလွင်၊ အင်းလေး၊ ကလော-တောင်ကြီး၊ ကော့သောင်း၊ ကျောက်ဖြူ၊ မာန်အောင် နှင့် ပူတာအို တို့ ပါဝင်ကြောင်း ထုတ်ပြန်ချက်အရ သိရသည်။

အထက်ပါခရီးစဥ်ဒေသများ၏ ဒေသတစ်ခုချင်းစီအလိုက် ခရီးသွားဆွဲဆောင်ရာနေရာများနှင့် သွားလာလည်ပတ်ရာတွင် ဆောင်ရွက်နိုင်မည့် ဖော်ပြချက်များကို ဟိုတယ်နှင့်ခရီးသွားလာရေးဝန်ကြီးဌာန၏ website များဖြစ်သော www.tourism.gov.mm နှင့် www.tourisminmyanmar.com တို့တွင် ဝင်ရောက်လေ့လာနိုင်ကြောင်း ဝန်ကြီးဌာနမှ ထုတ်ပြန်ထားသည်။

ထို့ပြင် ခရီးသွားဧည့်သည်များ လာရောက်လည်ပတ်မှုများသည့် နေပြည်တော်တွင် လည်ပတ်ရန်ခရီးစဥ်ဒေသ(၃၈)ခုရှိကြောင်း ခရီးသွားလုပ်ငန်းကော်မတီဥက္ကဋ္ဌက ပြီးခဲ့သည့် ရက်ပိုင်းတွင် အသိပေးထားသည်။