ယွန်း (NSS) - စက်တင်ဘာ ၂၁

ယဥ်ကျေးမှုဖလှယ်ရေး အပါအဝင် ကဏ္ဍသုံးခု၌ ပူးပေါင်းဆောင်ရွက်မှုမြှင့်တင်ရေးကို မြန်မာ-ကာတာနှစ်နိုင်ငံဆွေးနွေးခဲ့ကြောင်း နိုင်ငံခြားရေးဝန်ကြီးဌာနမှ ထုတ်ပြန်ထားသည်။

နိုင်ငံခြားရေးဝန်ကြီးဌာန၊ ပြည်ထောင်စုဝန်ကြီး ဦးသန်းဆွေသည် ကာတာသံရုံး၊ ယာယီတာဝန်ခံ ဒေါက်တာရာရှစ်အက်ဘ်ဒူလာ အမ်အေအယ်လ်-ကူဝါရီအား စက်တင်ဘာလ(၂၀)ရက်တွင် နေပြည်တော်ရှိ နိုင်ငံခြားရေးဝန်ကြီးဌာနတွင် လက်ခံတွေ့ဆုံခဲ့ကြောင်း သိရသည်။

ထိုသို့ တွေ့ဆုံစဥ် မြန်မာ- ကာတာနှစ်နိုင်ငံအကြား ချစ်ကြည်ရင်းနှီးမှုနှင့် ပူးပေါင်းဆောင်ရွက်မှု ပိုမိုတိုးမြှင့်ရေးကို ဆွေးနွေးခဲ့ကြသည်။

ထို့ပြင် ကုန်သွယ်ရေး အပါအဝင် ရင်းနှီးမြှုပ်နှံမှုနှင့် ယဥ်ကျေးမှုဖလှယ်ရေးစသည့် ကဏ္ဍများတွင် နှစ်နိုင်ငံအကျိုးတူပူးပေါင်းဆောင်ရွက်မှုများမြှင့်တင်ရန်လည်း ဆွေးနွေးခဲ့ကြောင်း ဝန်ကြီးဌာနမှ သိရသည်။

နှစ်နိုင်ငံအကြား လက်မှတ်ရေးထိုးရန်ရှိသည့် သဘောတူစာချုပ်များကိုလည်း ဆွေးနွေးညှိနှိုင်းမှုများ ဆက်လက်ဖော်ဆောင်ရေးနှင့် ရခိုင်ပြည်နယ်မှ နေရပ်စွန့်ခွာသူများကို ပြန်လည်လက်ခံရေးဆိုင်ရာလုပ်ငန်းစဥ်များကို အကောင် အထည်ဖော်ရေး နှစ်နိုင်ငံဆွေးနွေးခဲ့ကြောင်း သိရသည်။

ထို့ပြင် ဒေသတွင်း နှင့် နိုင်ငံတကာမျက်နှာစာတွင် အထူးသဖြင့် အာဆီယံ-အာရပ် ပင်လယ်ကွေ့ပူးပေါင်းဆောင်ရွက်ရေးကောင်စီ နှင့် ကုလသမဂ္ဂမူဘောင်တို့အောက်မှ ပိုမိုနီးကပ်စွာ ပူးပေါင်းဆောင်ရွက်ရေးကိစ္စရပ်များနှင့်စပ်လျဉ်း၍ ဆွေးနွေးခဲ့ကြောင်း နိုင်ငံခြားရေးဝန်ကြီးဌာနမှ ထုတ်ပြန်ထားသည်။

အလားတူ မြန်မာနိုင်ငံနှင့် ကာတာနိုင်ငံတို့အကြား လေကြောင်းလိုင်းများ ပြန်လည် ပျံသန်းပြေးဆွဲနိုင်ရေးကိုလည်း ပြီးခဲ့သည့် ဇူလိုင်လက နှစ်နိုင်ငံဆွေးနွေးမှုများရှိခဲ့ပြီး စွမ်းအင်၊ ဟိုတယ်နှင့် ခရီးသွားလုပ်ငန်း၊ ရင်းနှီးမြှုပ်နှံမှုနှင့် ကုန်သွယ်ရေးတိုးမြှင့်သွားရေးတို့ကိုလည်း နှစ်နိုင်ငံဆွေးနွေးခဲ့ကြသည်။