Pika (NSS) - စက်တင်ဘာ ၁၃

 ရုရှား နှင့် ယူကရိန်းကြားပဋိပက္ခသည် ကြာရှည်မည့် အလားအလာများရှိနေသော်လည်း စိတ်ပျက်မှုများမရှိ ကြောင်းနှင့် လာမည့်ဆယ်စုနှစ်အထိ ယူကရိန်းကို ကျောထောက်နောက်ခံပြုသွားမည်ဖြစ်ကြောင်း ဂျာမနီ ဗိုလ်မှူးချုပ် Christian Freuding က ပြောကြားခဲ့သည်။

ထို့အပြင် မကြာမီကာလအတွင်း ယူကရိန်းပဋိပက္ခ အဆုံးသတ်သွားနိုင်သည့် အလားအလာများကိုလည်း မမြင်မိ ကြောင်း ၎င်းက ပြောခဲ့သည်။

၎င်းက "၂ဝ၃၂ ခုနှစ်အထိ ယူကရိန်းကို စစ်ရေးအကူအညီတွေပံ့ပိုးပေးဖို့ ဂျာမနီလွှတ်တော်ရဲ့ထောက်ခံမှုကိုလည်း ကျွန်တော်တို့ ရရှိထားပါတယ်။ ယူကရိန်းကို ရေရှည်ထောက်ပံ့မှုတွေ လုပ်ဆောင်ဖို့ ကျွန်တော်တို့ အဆင်သင့် ဖြစ်နေပါပြီ" ဟု ပြောခဲ့သည်။ 

ထို့အပြင် ရုရှားနှင့်စစ်ပွဲတွင် ယူကရိန်းအနိုင်ရရှိစေရန်အတွက် ဂျာမနီသည် ယူကရိန်းသို့ စစ်လက်နက်ပစ္စည်းများ ကူညီပံ့ပိုးပေးမှုကို ပိုမိုအရှိန်မြှင့်တင်ရန်နှင့် ပံ့ပိုးကူညီမှုများ ပိုမိုကောင်းမွန်စေရန်အတွက် ညှိနှိုင်းမှုများကို လုပ်ဆောင်နေကြောင်း ၎င်းက အခိုင်အမာပြောခဲ့သည်။

ဂျာမနီအစိုးရသည် ယူကရိန်းသို့ အမြောက်များ၊ ခဲယမ်းမီးကျောက်များ နှင့် လေကြောင်းရန်ကာကွယ်ရေးးစနစ်များ ထောက်ပံ့ပေးရန်အတွက် အာရုံစိုက်လုပ်ဆောင်နေကြောင်း ဂျာမန်အဓိပတိ အိုလက်ဖ်ရှိုးလ်က ပြီးခဲ့သည့်လတွင် ထုတ်ဖော်ပြောခဲ့သည်။

ဂျာမနီသည် စစ်မြေပြင်တွင် ချက်ချင်းအကျိုးသက်ရောက်မှုများရှိစေမည့် စစ်လက်နက်ပစ္စည်းများကို ယူကရိန်းသို့ ဦးစားပေးထောက်ပံ့ပေးရန် စီစဉ်နေကြောင်း အိုလက်ဖ်ရှိုးလ်က ထပ်မံပြောခဲ့သည်။ G7 အဖွဲ့ဝင်နိုင်ငံများသည် ယူကရိန်းပဋိပက္ခက အချိန်ကြာမြင့်နိုင်ကြောင်း ခန့်မှန်းပြောဆိုထားပြီး ပဋိပက္ခဖြစ်ပွားနေချိန်အတွင်း ယူကရိန်း လိုအပ်သည့်အရာအားလုံးကို ထောက်ပံ့ပေးသွားရန် အဆင်သင့်ရှိနေကြောင်း ကနေဒါဝန်ကြီးချုပ်ထရုဒိုး က ပြီးခဲ့သည့် ဩဂုတ်လတွင် ထုတ်ဖော်ပြောခဲ့သည်။