သန့်ဇင်(NSS) - စက်တင်ဘာ ၁၁

ရန်ကုန်တိုင်း၊ သာကေတမြို့နယ်တွင် YBS ကားပေါ်မှ ခရီးသည်အမျိုးသား(၂)ဦးပြုတ်ကျခဲ့ရာ တစ်ဦးမှာ ပွဲချင်းပြီးသေဆုံးသွားခဲ့ကြောင်း သာကေတမြို့နယ် လူမှုကူညီရေးအသင်းထံမှ သိရသည်။

ဖြစ်စဉ်မှာ ယနေ့(စက်တင်ဘာလ ၁၁ရက်)၊ နံနက် ၇နာရီခွဲအချိန်တွင် သာကေတမြို့နယ်၊ အနော်မာလမ်းနှင့်ထီလာရုံလမ်းထိပ်တွင် ဖြစ်ပွားခဲ့ကြောင်း သိရသည်။

“YBSပေါ်က ပြုတ်ကျတာပါ။ ပြုတ်ကျတာတော့ (၂)ယောက်ပဲရှိပါတယ်။ တစ်ယောက်ကတော့ သေသွားတယ်” ဟု သာကေတမြို့နယ် လူမှုကူညီရေးအသင်းမှတာဝန်ရှိသူတစ်ဦးက NSS ကိုပြောသည်။

YBS ပေါ်မှပြုတ်ကျခဲ့သည့် အမျိုသားနှစ်ဦးသည် အသက်(၂၀)နှစ်ဝန်းကျင်များဖြစ်ကြပြီး အမျိုးသားတစ်ဦးသည် ပြုတ်ကျမှုကြောင့် ဦးခေါင်းထိခိုက်ဒဏ်ရာရရှိကာ နေရာတွင် ပွဲချင်းပြီးသေဆုံးသွားခဲ့ကြောင်း သိရသည်။

“ပြုတ်ကျတဲ့ လူ(၂)ယောက်လုံးကတော့ လူငယ်ပိုင်းတွေပါဗျ။ တစ်ယောက်ကတော့ ပွန်းပဲ့ထိခိုက်ဒဏ်ရာလောက်ပဲရှိပါတယ်”ဟု ၎င်းကဆက်လက်ပြောသည်။

သေဆုံးသူအမျိုသားအား မနောဖြူလူမှုကူညီရေးအသင်းမှ သင်္ဃန်းကျွန်းမြို့နယ်ရှိ စံပြဆေးရုံသို့ပို့ဆောင်ပေးခဲ့ပြီး ထိခိုက်ဒဏ်ရာရရှိခဲ့သူအား ရန်ကုန်ဆေးရုံကြီးသို့ အမတ္တဂဝေသီလူမှုကူညီရေးအသင်းမှ ပို့ဆောင်ကူညီပေးခဲ့ကြောင်း သိရသည်။