NSS - စက်တင်ဘာ ၆

နစကအနေဖြင့် ဗလငါးတန်နှင့်ပြည့်စုံသော လူငယ်များပေါ်ထွန်းလာစေရေးအတွက် အလေးထားဆောင်ရွက်နေကြောင်း ရခိုင်ပြည်နယ်ဝန်ကြီးချုပ်ဦးထိန်လင်းက ပြောသည်။

၎င်းက ယနေ့(စက်တင်ဘာလ ၆ ရက်)တွင် ရခိုင်ပြည်နယ်၊ စစ်တွေမြို့ရှိ စစ်တွေတက္ကသိုလ်၌ ပြန်ကြားရေးနှင့်ပြည်သူ့ဆက်ဆံရေးဦးစီးဌာန နှင့် စစ်တွေတက္ကသိုလ်တို့က ပူးပေါင်းကျင်းပသည့် လူငယ်စကားဝိုင်းအခမ်းအနားတွင် အထက်ပါကဲ့သို့ ထည့်သွင်းပြောကြားခဲ့ခြင်းဖြစ်သည်။

ယခုကဲ့သို့ လူငယ်စကားဝိုင်းများသည် ဗလငါးတန်ထဲတွင် ဉာဏဗလဟုခေါ်သည့် ဉာဏ်ပညာဖွံ့ဖြိုးစေရန်၊ စာရိတ္တ ဗလဟုခေါ်သည့် ကိုယ့်ကျင့်သိက္ခာကောင်းမွန်စေရန်၊ မိတ္တဗလဟုခေါ်သည့် မိတ်ဆွေအပေါင်းအသင်းကောင်းများ တိုးပွားလာစေရန် စသည့်ရည်ရွယ်ချက်ကောင်းများဖြင့် ပြည့်စုံနေသည်ကို တွေ့ရှိရသည်ဟု ဝန်ကြီးချုပ်က ပြော သည်။

နိုင်ငံတော်စီမံအုပ်ချုပ်ရေးကောင်စီအနေဖြင့် လူငယ်များ၏ အသိပညာဗဟုသုတဖွံ့ဖြိုးတိုးတက်စေရန် ဗလငါးတန်နှင့်ပြည့်စုံသော လူငယ်များပေါ်ထွန်းလာစေရေးအတွက် အလေးထားဆောင်ရွက်လျက်ရှိကြောင်း ရခိုင်ပြည်နယ်ဝန်ကြီးချုပ်ဦးထိန်လင်းက ထည့်သွင်းပြောကြားခဲ့သည်။

ဆက်လက်ပြီး ၎င်းက လူငယ်များသည် နိုင်ငံ၏အဖိုးတန်လူ့စွမ်းအားအရင်းအမြစ်များဖြစ်၍ နိုင်ငံတော်ဖွံ့ဖြိုးတိုးတက်ရေးအတွက် အဓိကစွမ်းအားစုများဖြစ်လာစေရန် မျှော်လင့်ထားသည်ဟုလည်း ပြောသည်။

လက်ရှိတွင် လူငယ်များ ဗလငါးတန်ဖွံ့ဖြိုးတိုးတက်ရေးအတွက် ရည်ရွယ်ကာ လူငယ်စကားဝိုင်းများ၊ လူငယ်ရေးရာအသိပညာပေးဟောပြောပွဲများကို နိုင်ငံတစ်ဝန်းရှိ တက္ကသိုလ်၊ ကောလိပ်များ၊ အခြေခံပညာကျောင်းများတွင် ကျယ်ကျယ် ပြန့်ပြန့် ကျင်းပလျက်ရှိကြောင်း သိရသည်။

ယနေ့တွင် စစ်တွေတက္ကသိုလ်၌ ကျင်းပသည့် လူငယ်စကားဝိုင်းအခမ်းအနားသို့ ရခိုင်ပြည်နယ်ဝန်ကြီးချုပ်ဦးထိန်လင်း၊ ပြည်နယ်ဝန်ကြီးများ၊ ဌာနဆိုင်ရာတာဝန်ရှိသူများ၊ စစ်တွေတက္ကသိုလ်ပါမောက္ခချုပ်နှင့် ဆရာ/ဆရာမများ၊ ကျောင်းသား/ သူများ တက်ရောက်ခဲ့ကြောင်း သိရသည်။