ယွန်း (NSS) - စက်တင်ဘာ ၅

Naypyitaw State Academy ရှိ ဘာသာရပ်ခြောက်ခု၌ ဖွင့်လှစ်မည့် ပါရဂူသင်တန်းများအတွက် အိန္ဒိယတက္ကသိုလ်များနှင့် ပူးပေါင်းဆောင်ရွက်ရန် နှစ်နိုင်ငံဆွေးနွေးခဲ့ကြောင်း နစကမှ သိရသည်။

ပညာရေးဝန်ကြီးဌာန၊ ဒေါက်တာညွန့်ဖေက စက်တင်ဘာလ(၄)ရက်တွင် အိန္ဒိယသံအမတ်ကြီး H.E. Mr. Vinary Kumar နှင့် နေပြည်တော်ရှိ ဝန်ကြီးဌာန ဧည့်ခန်းမ၌တွေ့ဆုံစဥ် အထက်ပါကဲ့သို့ ပြောကြားခဲ့ခြင်းဖြစ်သည်။

ထိုသို့တွေ့ဆုံစဥ် Naypyitaw State Academy မှ ဘာသာရပ်‌ခြောက်ခုတွင် ပါရဂူသင်တန်းများ ဖွင့်လှစ်မည်ဖြစ်သောကြောင့် အိန္ဒိယတက္ကသိုလ်များ နှင့် ပူးပေါင်းဆောင်ရွက်နိုင်ရေးကို ဆွေးနွေးခဲ့ကြကြောင်း သိရသည်။

ထို့ပြင် မြန်မာနိုင်ငံမှ တက္ကသိုလ်ငါးခုနှင့် အိန္ဒိယနိုင်ငံရှိ အငယ်စားနှင့် အလတ်စား စက်မှုလုပ်ငန်းများ ပူးပေါင်းဆောင်ရွက်ရေးကိုလည်း နှစ်နိုင်ငံတာဝန်ရှိသူများဆွေးနွေးခဲ့ကြောင်း သိရသည်။ 

အလားတူ အိုင်စီတီ၊ အသိဉာဏ်တု၊ အဏ္ဏဝါသိပ္ပံ၊ အဏုဇီဝ၊ အင်္ဂလိပ်စာသင်ကြားရေး၊ စီးပွားရေးစီမံခန့်ခွဲမှု၊ သက်မွေးပညာနှင့် ဆရာအတတ်သင်ပညာဘာသာရပ်များအတွက် ပညာတော်သင်များ ပိုမိုစေလွှတ်နိုင်ရေးကိုလည်း ဆွေးနွေးခဲ့ကြသည်။

ထို့ပြင် နှစ်နိုင်ငံအကြား လမ်းပန်းဆက်သွယ်မှု ချိတ်ဆက်ရေးနှင့် နယ်စပ်ဖြတ်ကျော် လျှပ်စစ်ဓာတ်အားလိုင်း သွယ် တန်းမှုတို့အပါအဝင် အပြန်အလှန်အကျိုးဖြစ်ထွန်းစေမည့် ပူးပေါင်းဆောင်ရွက်မှုများ တိုးချဲ့ရေးကိုလည်း ပြီးခဲ့သည့် လပိုင်းက ဆွေးနွေးမှုများရှိခဲ့ကြောင်း သိရသည်။

Naypyitaw State Academy ကို ပြီးခဲ့သည့် ၂၀၂၂ ခုနှစ်၊ နိုဝင်ဘာလ(၉)ရက်တွင် ဖွင့်လှစ်ခဲ့ပြီး အဆိုပါကျောင်းတွင် ဝိဇ္ဇာပညာ၊ သိပ္ပံပညာ၊ ဥပဒေပညာ၊ စီးပွားရေးပညာ၊ ဆေးပညာ၊ လူမှုရေးပညာနှင့် အားကစားပညာမဟာဌာနများ ပါဝင်ဖွဲ့စည်းထားပြီး ပညာရေးဝန်ထမ်း(၂၄ဝဝ)ကျော်ဖြင့် သင်ကြားမှုခွင့်ပြုထားကြောင်း သိရသည်။