NSS - စက်တင်ဘာ ၁

၄ လနှင့်အထက် မီတာမဆောင်သူများနှင့် ၆ လနှင့်အထက် သုံစွဲမှုမရှိသော မီတာပုံးများကို ယနေ့ စက်တင်ဘာလ ၁ ရက်မှစ၍ လိုက်လံဖြုတ်သိမ်းတော့မည်ဟု ရန်ကုန်မြို့တော် လျှပ်စစ်ဓါတ်အားပေးရေး ကော်ပိုရေးရှင်း YESC မှ ထုတ်ပြန်ထား ကြောင်း မြို့နယ်လျှပ်စစ်ရုံးများမှ သိရသည်။ 

မီတာပုံးများအား လိုက်လံဖြုတ်သိမ်းမည် ဆိုခြင်းကို ပြီးခဲ့သည့်ဇွန်လအတွင်းကစ၍ မြို့နယ်အသီးသီး၏ လျှပ်စစ်ရုံးများတွင် ဗီနိုင်းဆိုင်းဘုတ်များကပ်ကာ အသိပေးထားပြီး အရေးယူဆောင်ရွက်မှုအား စက်တင်ဘာ ၁ ရက်က စတင်ပြုလုပ်မည်ဟု သိရသည်။  

"ကြွေးကျန်ရှိနေတဲ့သူတွေရော၊ ဇီရိုးမီတာချည်းပဲ ဖြစ်နေတဲ့သူတွေကိုရော ဒီလကစပြီး အရေးယူမယ်လို့ အသိပေး ထားတာ သုံးလလောက်ကြာပြီ၊ အဲဒါတွေအပြင် မီတာဆောင်ဖို့ ရက်ကျော်တဲ့သူတွေကိုလည်း မီးဖြတ်တဲ့ အရေးယူ မှုတွေ လုပ်သွားမယ်လို့ သိရတယ်" ဟု တောင်ဒဂုံမြို့နယ်၏ လျှပ်စစ်ဝန်ထမ်းတစ်ဦးက ပြောသည်။ 

၄ လနှင့်အထက် မီတာကြွေးကျန်ရှိသူများနှင့် ၆ လနှင့်အထက် မီတာသုံးစွဲမှုမရှိသူများကို သက်ဆိုင်ရာမြို့နယ် အလိုက် စိစစ်ထားကာ ယနေ့မှစ၍ ရက်ပိုင်းအတွင်း မီတာပုံးများအား လိုက်လံဖြုတ်သိမ်းမည်ဟု သိရသည်။ 

၆ လနှင့်အထက် မီတာသုံးစွဲမှု မရှိသူများ၏ မီတာပုံးများအား ဖြုတ်သိမ်းမည့်အပေါ်တွင် လူထုအကြားဝေဖန်မှုများ ရှိနေသည်။ 

ထို့ပြင် မီတာဖြုတ်သိမ်းခံရပါက သက်ဆိုင်ရာမြို့နယ်လျှပ်စစ်ရုံးတွင် အသစ်ပြန်လည်လျှောက်ထားကာ ဝယ်ယူ သုံးစွဲရမည်ဟု သိရပြီး လက်ရှိ ကာလပေါက်စျေးအရ ရိုးရိုးအိမ်သုံးမီတာတစ်လုံးလျှင် ကျပ်တစ်သိန်းကျော်မှ ပါဝါ မီတာတစ်လုံးလျှင် ဆယ့်နှစ်သိန်းကျပ် ဝန်းကျင်အထိရှိပြီး ပြန်လည်တပ်ဆင်ရန် မြို့နယ်လျှပ်စစ်ရုံးတွင် လျှောက် ထားပါက ရက်သတ္တပတ် နှစ်ပတ်မှ တစ်လအတွင်း ကြာမြင့်နိုင်ကြောင်းသိရသည်။