Pika (NSS) - စက်တင်ဘာ ၁

ရုရှား၏ iPhone တင်သွင်းမှုများသည် ယခုနှစ်အတွင်း ပိုမိုမြင့်တက်လာခဲ့ပြီး ၂ဝ၂၃ ခုနှစ် ပထမနှစ်ဝက် နှင့် ပြီးခဲ့သည့်နှစ် ပထမနှစ်ဝက်နှိုင်းယှဉ်မည်ဆိုပါက (၁၅)ရာခိုင်နှုန်းမြင့်တက်လာခဲ့ကြောင်း analytical center GS Group ၏ အချက်အလက်များကို ကိုးကားပြီး  Vedomosti သတင်းစာက ဖော်ပြခဲ့သည်။ 

ရုရှားနိုင်ငံသို့ ယခုနှစ် နှစ်ဝက်အတွင်း Apple ၏ထုတ်ကုန်ပေါင်း(၁ ဒသမ ၁) သန်းခန့် တင်သွင်းခဲ့ကြောင်း Vedomosti သတင်းစာက ဖော်ပြထားသည်။ အစီရင်ခံစာအရ အဆိုပါအရောင်းပမာဏသည် ရူဘယ် (၁ဝ၅ ဒသမ ၇) ဘီလျံခန့် ရှိကြောင်း သိရသည်။

ငွေကြေးအရ ရုရှားနိုင်ငံဈေးကွက်တွင်  Apple ထုတ်ကုန်များသည် (၃၄)ရာခိုင်နှုန်းဖြင့် ဦးဆောင်နေပြီး တရုတ်၏ Xiaomi က (၁၉)ရာခိုင်နှုန်းနှင့် တောင်ကိုရီးယား၏ Samsung က (၁၆)ရာခိုင်နှုန်း ရှိကြောင်း သိရသည်။ 

သို့သော်လည်း ယူနစ်သတ်မှတ်ချက်များအရ တရုတ်နိုင်ငံထုတ် Xiaomi ၏ ဈေးကွက်ရှယ်ယာ (၂၇ ဒသမ ၉) ရာခိုင်နှုန်း နှင့် တောင်ကိုရီးယားနိုင်ငံထုတ် Samsung ၏ ဈေးကွက်ရှယ်ယာ(၁၆)ရာခိုင်နှုန်း နှင့် နှိုင်းယှဉ်မည်ဆို ပါက ဝယ်လိုအားကျဆင်းမှုများနှင့်အတူ Apple smartphones များ၏ ဈေးကွက်ရှယ်ယာသည် (၉)ရာခိုင်နှုန်းထိ ကျဆင်းသွားခဲ့ကြောင်း သိရသည်။

ထို့အပြင် ရုရှားဈေးကွက်ရှယ်ယာတွင် တရုတ်ထုတ် Realmi သည် (၁၂ ဒသမ ၁) ရာခိုင်နှုန်းရှိပြီး Tecno သည် (၁ဝ ဒသမ ၄) ရာခိုင်နှုန်းရှိကာ Apple smartphones များ၏ ဈေးကွက်ရှယ်ယာက အနည်းဆုံးဖြစ်နေ ကြောင်း သိရသည်။ ၂ဝ၂၃ ခုနှစ် ပထမခြောက်လအတွင်း ရုရှားနိုင်ငံသို့တင်သွင်းသော  iPhone အရေအတွက်သည် ပိတ်ဆို့ အရေးယူမှု ချမှတ်မခံရမီ ၂ဝ၂၁ ခုနှစ်က တင်သွင်းသည့်အလုံးရေထက် တစ်သန်းလျော့နည်းခဲ့ကြောင်း စာရင်းအင်း အချက်အလက်များအရ သိရသည်။

ယူကရိန်းပဋိပက္ခနှင့်ပတ်သက်ပြီး  ပြီးခဲ့သည့်မတ်လတွင်  Apple ကုမ္ပဏီသည် ရုရှားတွင်  iPhone နှင့် အခြား ထုတ်ကုန်များရောင်းချခြင်းကို ရပ်တန့်ခဲ့ကြောင်း သိရသည်။ ထို့အပြင် ပြီးခဲ့သည့် ဧပြီလတွင် Apple ကုမ္ပဏီသည် ရုရှားနိုင်ငံအတွင်းတွင် Macs နှင့် iPad များအတွက် အာမခံဝန်ဆောင်မှုပေးခြင်းကိုလည်း ရပ်တန့်ခဲ့ကြောင်းလည်း သိရသည်။