ဂျန်ဇက် (NSS) - ဩဂုတ် ၂၉

မြောက်ကိုရီးယားရေတပ်ဟာ နျူကလီးယားလက်နက်များ လက်ခံရရှိတော့မှာဖြစ်ကြောင်း မြောက်ကိုရီးယားခေါင်းဆောင်ကင်ဂျုံအမ်က ထုတ်ဖော်ပြောခဲ့ပါတယ်။

ဂျပန်၊ တောင်ကိုရီးယား နဲ့ အမေရိကန်နိုင်ငံတို့ကြား အာရှပစိဖိတ်ဒေသမှာ စစ်ရေးပူးပေါင်းဆောင်ရွက်မှုများ တိုးမြင့်လုပ်ဆောင်လာခဲ့ပြီးနောက် မြောက်ကိုရီးယားနိုင်ငံက အခုလိုမျိုးလုပ်ဆောင်လာခဲ့တာဖြစ်ပါတယ်။ မြောက်ကိုရီးယားအနေနဲ့ ရေတပ်သင်္ဘာတွေမှာ အော်တိုမစ်တစ် လက်နက်များတပ်ဆင်သွားမှာဖြစ်ကြောင်း၊ မြောက်ကိုရီးယားရေတပ်ဟာ နျူကလီးယားဟန့်တားမှုတွေအတွက် အဓိကအစိတ်ပိုင်းအဖြစ် ပါဝင်မှာဖြစ်ကြောင်း ကင်ဂျုံအမ်က ပြောပါတယ်။

ကင်ဂျုံအမ်ဟာ ပြီးခဲ့တဲ့ရက်ပိုင်းက မြောက်ကိုရီးယားရေတပ်ဌာနချုပ်ကို သွားရောက်ခဲ့ပြီးနောက် အခုလိုမျိုးပြောခဲ့တာဖြစ်ပါတယ်။ ကင်ဂျုံအမ်ဟာ ရေတပ်သင်္ဘောသားများနဲ့တွေ့ဆုံချိန်အတွင်း စစ်သင်္ဘောအချို့ကို နျူကလီးယားလက်နက်များ မကြာမီတပ်ဆင်ပေးတော့မှာဖြစ်ကြောင်း၊ ရေတပ်ဟာ မြောက်ကိုရီးယားရဲ့နျူကလီးယားတပ်ဖွဲ့မှာ အဓိကအစိတ်အပိုင်းဖြစ်လာတော့မှာဖြစ်ကြောင်း ပြောပါတယ်။

ကင်ဂျုံအမ်က "ကျွန်တော်တို့ရဲ့ရေတပ်ဟာ နိုင်ငံအချုပ်အခြာအာဏာ၊ နိုင်ငံကံကြမ္မာနဲ့ အကျိုးစီးပွားတွေကိုကာကွယ်ရာမှာ အဓိကအရေးကြီးဆုံးအခန်းကဏ္ဍက ပါဝင်နေပါတယ်။ နိုင်ငံလုံခြုံရေးကို ကာကွယ်ဖို့ ရေတပ်ဟာ ကြိုတင်ပြင်ဆင်မှုပြည့်ဝအောင် လုပ်ဆောင်ထားရမှာဖြစ်တယ်" လို့ ပြောပါတယ်။

အမေရိကန်နိုင်ငံ နဲ့ အခြားဒေသအတွင်းရှိ နိုင်ငံတွေဟာမြောက်ကိုရီးယားကို အရင်ထက် ပိုကြောက်လာတဲ့အတွက် ပြီးခဲ့တဲ့လတွေအတွင်းမှာ အမေရိကန်၊ တောင်ကိုရီးယား နဲ့ ဂျပန်နိုင်ငံတို့ပူးပေါင်းပြီး စစ်ရေးလေ့ကျင့်ခန်းတွေကို အကြိမ်ကြိမ်လုပ်ဆောင်ခဲ့ကြောင်း ကင်ဂျုံအမ်က ပြောပါတယ်။

ကိုရီးယားကျွန်းဆွယ်နားမှာ အမေရိကန်အပြင် အခြားရန်လိုတဲ့ နိုင်ငံတွေနဲ့ မြောက်ကိုရီးယားနိုင်ငံကြား ထိပ်တိုက်တွေ့ဆုံမှုတွေဟာ နျူကလီးယားစစ်ပွဲအထိ ဦးတည်နိုင်ပြီးရေကြောင်း မတည်ငြိမ်မှုတွေဖြစ်လာနိုင်ကြောင်း ကင်ဂျုံအမ်က ပြောပါတယ်။