Pika (NSS) - သြဂုတ် ၂၈ 

စင်ကာပူနိုင်ငံသားနှစ်ဦးက မြန်မာရေတပ်စီမံခန့်ခွဲနေသော survey centre ကို ဆိုနာစနစ်များ ရောင်းချမှုနှင့်အတူ စစ်လက်နက်ပစ္စည်းများ အပါအဝင် မဟာဗျူဟာမြောက် ကုန်ပစ္စည်းများ ရောင်းချခြင်းကို ထိန်းချုပ်သောဥပဒေကို ချိုးဖောက်ခဲ့ကြောင်း ဝန်ခံပြောခဲ့သည်။ 

Hydronav Services (S)ကုမ္ပဏီမှ အသက်(၅၇)နှစ်အရွယ် အရောင်းမန်နေဂျာ Poiter Agus Kentjana နှင့် ကုမ္ပဏီ၏ ဒါရိုက်တာတစ်ဦးဖြစ်သည့်  Wui Ong Chuan တို့သည် မဟာဗျူဟာမြောက်ကုန်စည်ရောင်းချမှု ထိန်းချုပ်ရေးအက်ဥပဒေအရ လိမ်လည်မှုတစ်ခုနှင့် စွဲချက်တစ်ခုအတွက် အပြစ်ရှိကြောင်း ဝန်ခံခဲ့ခြင်းဖြစ်သည်။ အသက်(၇ဝ)အရွယ် Wui Ong Chuan သည် Hydronav Services (S)ကုမ္ပဏီ၏ သွင်းကုန် နှင့် ပို့ကုန်လုပ်ငန်းများ တွင် ပါဝင်သည့် တစ်ဦးတည်းသော ဒါရိုက်တာဖြစ်ကြောင်းလည်း သိရသည်။

အဆိုပါအမှုတွင် ပင်လယ်ကြမ်းပြင်မြေပုံအတွက် multibeam echosounder စနစ်တစ်ခု ပါဝင်ကြောင်းလည်း သိရသည်။ အဆိုပါစနစ်ကို မြန်မာနိုင်ငံမှ ကုမ္ပဏီတစ်ခုဖြစ်သည့် Light of Universe သို့ အမေရိကန်ဒေါ်လာ (၁ ဒသမ ၆) သန်းနီးပါးဖြင့် ရောင်းချခဲ့ခြင်းဖြစ်ကြောင်း သိရသည်။

မြန်မာရေပိုင်နက်အတွင်း ရေကြောင်းနှင့်ပတ်သက်သော သုတေသနလုပ်ငန်းများ လုပ်ဆောင်ရန်အတွက် အဆိုပါ စနစ်ကို ဝယ်ယူခဲ့ခြင်းဖြစ်ပြီး စစ်ဘက်နှင့် အရပ်ဘက်နှစ်မျိုးလုံးတွင် အသုံးပြုနိုင်ကြောင်း သိရသည်။ စင်ကာပူ အစိုးရရှေ့နေက အဆိုပါစနစ်ကို စစ်ရေးရည်ရွယ်ချက်ဖြင့်  လက်ရှိအချိန်အသုံးပြုနေခြင်းမျိုး မတွေ့ရကြောင်း ပြောဆိုခဲ့သည်။ 

ယင်းကိစ္စနှင့်ပတ်သက်ပြီး Hydronav Services (S)ကုမ္ပဏီကို အမေရိကန်ဒေါ်လာ(၁)သန်းကျော် ဒဏ်ငွေ ဆောင်ခိုင်းခြင်း အပါအဝင် ပါဝင်ပတ်သက်သူများကို ဒဏ်ငွေပေးဆောင်စေရန်အတွက် စီစဉ်နေကြောင်း တရားရုံးက ပြောကြားခဲ့သည်။ 

Poiter Agus Kentjana နှင့် Wui Ong Chuan တို့သည် အဆိုပါစနစ်ရောင်းချသူ နော်ဝေးကုမ္ပဏီ Kongsberg Maritime ကို လိမ်လည်လှည့်ဖျားရန် ပူးပေါင်းကြံစည်ခဲ့ကြောင်း သိရသည်။ Poiter Agus Kentjana နှင့် Wui Ong Chuan တို့က အင်ဒိုနီးရှာကုမ္ပဏီ PT Bina Nusantara Perkasa သည် အဆိုပါစနစ်ကို နောက်ဆုံးအသုံးပြုသူ ဖြစ်မည်ဟုပြောဆိုကာ နော်ဝေးကုမ္ပဏီ Kongsberg Maritime ကို လိမ်လည်လှည့်ဖြားခဲ့ခြင်းဖြစ်ကြောင်း သိရသည်။

နော်ဝေးနိုင်ငံမှ အဆိုပါစနစ်ကို တင်ပို့ပေးရန်အတွက် နော်ဝေးအာဏာပိုင်များထံမှ အတည်ပြုချက်ကို ရရှိရန် အင်ဒိုနီးရှားနိုင်ငံက နောက်ဆုံးအသုံးပြုသူဖြစ်မည်ဆိုသည့် လိမ်လည်စာရင်းသွင်းမှုကို Poiter Agus Kentjana ကြံစည်ခဲ့ခြင်းဖြစ်ကြောင်း သိရသည်။

အစီရင်ခံစာအတုကို လက်ခံရရှိပြီးနောက် နော်ဝေးအာဏာပိုင်များသည် multibeam echosounder စနစ်ကို ၂ဝ၁၈ ခုနှစ် ဇူလိုင်လ(၁၇)ရက်တွင် နော်ဝေးနိုင်ငံမှ စင်ကာပူနိုင်ငံသို့ ပေးပို့ခဲ့ကြောင်း သိရသည်။