NSS - ဩဂုတ် ၂၇

မကွေးတိုင်း၊ နတ်မောက်မြို့နယ်ရှိ ကျေးရွာအုပ်ချုပ်ရေးမှူးတစ်ဦးကို PDF အဖွဲ့က ဓားဖြင့်ထိုးခုတ်သတ် ဖြတ်ခဲ့ကြောင်း မြန်မာနိုင်ငံရဲတပ်ဖွဲ့က သတင်းထုတ်ပြန်ထားသည်။

ဖြစ်စဉ်မှာ ပြီးခဲ့သည့် ဩဂုတ်လ ၂၄ ရက်၊ ည ၁၀နာရီအချိန်တွင် နတ်မောက်မြို့နယ်၊ ဆည်လည်ကျေးရွာအနောက်ဘက် တစ်မိုင်ခန့်အကွာ ဆည်လည်ကျေးရွာနှင့် ကန်သာကျေးရွာသွား ချောင်းမကြီးလှည်းလမ်းပေါ်တွင် ဖြစ်ပွားခဲ့ကြောင်း သိရသည်။

ဆည်လည်ကျေးရွာတွင် နေထိုင်သည့် သေဆုံးသူအမျိုးသားသည် ၎င်း၏နေအိမ်၌ရှိနေစဉ် PDF အဖွဲ့ အင်အား(၆)ဦးက ဆိုင်ကယ် (၃)စီးဖြင့်ရောက်ရှိလာပြီး အထက်ပါနေရာသို့ ဖမ်းဆီးခေါ်ဆောင်သွားကာ ဓားဖြင့် ထိုးခုတ်သတ်ဖြတ်ခဲ့ကြောင်း ရဲတပ်ဖွဲ့မှထုတ်ပြန်ထားသည်။

ထိုသို့ ဓားဖြင့်ထိုးခုတ်သတ်ဖြတ်ခံရမှုကြောင့် ဆည်လည်ကျေးရွာ အုပ်ချုပ်ရေးမှူးဖြစ်သူ ဦးမြင့်ငြိမ်း (၅၅)နှစ်တွင် လည်ပင်းပြတ်ရှဒဏ်ရာ တစ်ချက်ရရှိကာ အခင်းဖြစ်ပွားရာနေရာ၌ သေဆုံးသွားခဲ့ကြောင်း သိရသည်။

အလားတူ ဩဂုတ်လ ၂၆ ရက်၊ နံနက် ၅နာရီ ၅၀မိနစ်အချိန်တွင် မန္တလေးတိုင်း၊ ဝမ်းတွင်းမြို့နယ်၊ နေပူကုန်းကျေးရွာနှင့် ကုလားကျေးရွာကြား တောတန်းအတွင်း၌ အမျိုးသား(၂)ဦး သေနတ်ဖြင့် ပစ်သတ်ခံခဲ့ရကြောင်း ရဲတပ်ဖွဲ့မှ သတင်းထုတ်ပြန်ထားသည်။

သေဆုံးသူအမျိုးသား(၂)ဦးသည် အောင်မင်္ဂလာရပ်ကွက်နေသူများဖြစ်သည့် ကိုမျိုးအောင်(ခ)ဘာချို(၃၃)နှစ်နှင့် ဦးလှရွှေ(၅၆)နှစ်တို့ဖြစ်ပြီး အထက်ပါ တောတန်းအတွင်း၌ ကျည်ထိမှန်ဒဏ်ရာများဖြင့် သေဆုံးနေသည်ကိုတွေ့ရ၍ စစ်ဆေးနိုင်ရေး ဝမ်းတွင်းမြို့နယ် ပြည်သူ့ဆေးရုံသို့ ပို့ဆောင်ထားရှိကြောင်း သိရသည်။

ထို့နောက် အကြောင်းမဲ့လုပ်ကြံသတ်ဖြတ်မှုကျူးလွန်ခဲ့သည့် အကြမ်းဖက်သမားများအား ဖော်ထုတ်ဖမ်းဆီး၍ ဥပဒေနှင့်အညီ အပြစ်ပေးအရေးယူနိုင်ရေးလုံခြုံရေးတပ်ဖွဲ့ဝင်များက ဆက်လက်လုပ်ဆောင်လျက်ရှိကြောင်း မြန်မာနိုင်ငံရဲတပ်ဖွဲ့က သတင်းထုတ်ပြန်ထားသည်။