Pika (NSS) - ဩဂုတ် ၂၆

နိုင်ဂျာစစ်အစိုးရသည် ပြင်သစ်သံအမတ်ကြီး Sylvain Itte ကို နိုင်ငံတွင်းမှ ထွက်ခွါရန်အတွက် အချိန် (၄၈) နာရီပေးခဲ့ကြောင်းသိရသည်။

ပြင်သစ်အစိုးရ၏ လုပ်ဆောင်ချက်များသည် နိုင်ဂျာနိုင်ငံ၏ အကျိုးစီးပွားနှင့်ဆန့်ကျင်ဖက်ဖြစ်နေခြင်းကြောင့် အဆိုပါဆုံးဖြတ်ချက်ကို ချခဲ့ခြင်းဖြစ်ကြောင်း နိုင်ဂျာနိုင်ငံခြားရေးဝန်ကြီးဌာနကပြောကြားခဲ့သည်။

အာဏာသိမ်းစစ်ခေါင်းဆောင် Abdourahamane Tchiani သည် ဇူလိုင်လ(၂၆)ရက်တွင် ဒီမိုကရေစီနည်းကျရွေးကောက်တင်မြှောက်ထားသော သမ္မတမိုဟာမက်ဘာဇွန်ကို ရာထူးမှဖြုတ်ချကာ ဖမ်းဆီးထိန်းသိမ်းခဲ့ပြီးနောက် တစ်လအကြာတွင် ပြင်သစ်သံအမတ်ကြီးကို နိုင်ငံတွင်းမှနှင်ထုတ်ခဲ့ခြင်းဖြစ် ကြောင်းသိရသည်။ နိုင်ဂျာစစ်ခေါင်းဆောင်များ၏ အာဏာသိမ်းမှုကို တုံ့ပြန်သည့်အနေဖြင့် အနောက်အာဖရိကနိုင်ငံများ၏ စီးပွားရေးအသိုက်အဝန်း (ECOWAS) မှ အဖွဲ့ဝင်နိုင်ငံ(၁၁)နိုင်ငံသည် နိုင်ဂျာကို ပိတ်ဆို့အရေးယူမှုများချမှတ်ခဲ့ပြီး စစ်ရေးအရဝင်ရောက်စွက်ဖက်မည်ဟု သတင်းထုတ်ပြန်ခဲ့ကြောင်းသိရသည်။

Guinea နိုင်ငံသည် နိုင်ဂျာအပေါ် ပိတ်ဆို့အရေးယူမှုများ ချမှတ်ရန်ငြင်းဆိုခဲ့ပြီး မာလီနှင့် ဘာကီနာဖါဆိုနိုင်ငံတို့က နိုင်ဂျာကို စစ်ရေးအရဝင်ရောက်စွက်ဖက်မှုများသည် ၎င်းတို့ကို စစ်ကြေညာခြင်းအဖြစ် ရှုမြင်မည်ဖြစ်ကြောင်းပြောဆိုခဲ့သည်။ ထို့ပြင် ECOWAS ၏ စစ်ရေးအရဝင်ရောက်စွက်ဖက်မှုများရှိလာမည်ဆိုပါက ကာကွယ်ရေးနှင့်လုံခြုံရေးပိုင်းတွင် ပူးပေါင်းဆောင်ရွက်ပေးကြရန် မာလီနှင့်ဘာကီနာဖါဆိုတို့ကို နိုင်ဂျာစစ်အစိုးရက တိုက်တွန်းခဲ့ကြောင်းသိရသည်။

မာလီနှင့်ဘာကီနာဖါဆို နိုင်ငံခြားရေးဝန်ကြီးဌာနများက "စစ်ရေးအရဝင်ရောက်စွက်ဖက်မှုတွေရှိခဲ့ပါက ကာကွယ်ရေးနဲ့ လုံခြုံရေးပိုင်းတွေမှာ အပြန်အလှန်ကူညီပေးကြဖို့ သုံးနိုင်ငံလုံးက သဘောတူညီခဲ့ပါတယ်"ဟု ထုတ်ပြန်ထားသည်။

မာလီနိုင်ငံခြားရေးဝန်ကြီး Abdoulaye Diop နှင့် ဘာကီနာဖါဆိုနိုင်ငံခြားရေးဝန်ကြီး Olivia Rouamba တို့သည် ECOWAS နှင့်အနောက်အာဖရိက စီးပွားရေးနှင့် ငွေကြေးသမဂ္ဂ (UEMOA) တို့၏ နိုင်ဂျာအပေါ် ချမှတ်ထားသော ပိတ်ဆို့အရေးယူမှုများကို ပြစ်တင်ရှုတ်ချခဲ့ကြောင်းလည်းသိရသည်။ ECOWAS သည် နိုင်ဂျာနိုင်ငံထံ သံတမန်မစ်ရှင်များပေးပို့ခဲ့ပြီး စစ်ရေးအရဝင်ရောက်စွက်ဖက်မှုများနှင့်ပတ်သက်ပြီး နောက်ဆုံးအစီအစဉ်များကို အကြိမ်ကြိမ် ကြေညာခဲ့ကြောင်းသိရသည်။ ယခုသီတင်းပတ်အစောပိုင်းတွင် နိုင်ဂျာစစ်အာဏာသိမ်းခေါင်းဆောင် Tchiani သည် သုံးနှစ်ထက်မပိုသော အရပ်သားအုပ်ချုပ်မှုသို့ ပြန် လည်ရောက်ရှိရန် အဆိုပြုချက်ကို ဖော်ပြခဲ့ပြီး နိုင်ဂျာ၏ ပြည်တွင်းရေးကို ဝင်ရောက်မစွက်ဖက်ကြရန် ၎င်း၏အိမ်နီးချင်းနိုင်ငံများနှင့် ပြင်သစ်နိုင်ငံတို့ကို သတိပေးခဲ့ကြောင်းသိရသည်။