စော (NSS) - ဩဂုတ် ၂၅

အမှတ် (၁) သံမဏိစက်ရုံ(မြင်းခြံ)တွင် တာဝန်ထမ်းဆောင်ရန် ရာထူးနေရာ (၁၂ဝ)အတွက် အလုပ်လျှောက်လွှာခေါ်ယူနေကြောင်း သိရသည်။

စက်မှုဝန်ကြီးဌာန၊ အမှတ်(၁)အကြီးစားစက်မှုလုပ်ငန်းမှ ယနေ့ (ဩဂုတ်လ ၂၅ ရက်) ထုတ် နိုင်ငံပိုင်သတင်းစာ များတွင် အထက်ပါကဲ့သို့ကြေညာထားခြင်းဖြစ်သည်။

အဆိုပါရာထူး(၁၂ဝ)နေရာအနက် အလုပ်ရုံစိတ်မှူးရာထူး (၈၂)နေရာ၊ ထုတ်လုပ်ရေးကျွမ်းကျင် (၅)ရာထူး (၂၁) နေရာ နှင့် လုပ်သားရာထူး (၁၇)နေရာတို့ကို ခေါ်ယူသွားမည်ဖြစ်ကြောင်း ထုတ်ပြန်ထားသည်။

လျှောက်ထားလိုသူများသည် ဩဂုတ်လကုန်တွင် အသက် (၁၈)နှစ်ပြည့်ပြီး (၃၄)နှစ်ထက် မကျော်လွန်သူဖြစ်ရန် လိုအပ်ကြောင်း ထုတ်ပြန်ချက်တွင် ပါရှိသည်။

ထို့ပြင် နိုင်ငံဝန်ထမ်းဖြစ်ပါက အသက်(၄ဝ)နှစ်ထက် မကျော်လွန်သူဖြစ်ရန်လိုအပ်ပြီး သက်ဆိုင်ရာဝန်ကြီးဌာနမှတစ်ဆင့် လျှောက်ထားရမည်ဖြစ်ကြောင်း သိရသည်။ 

လျှောက်လွှာများကို စက်မှုဝန်ကြီးဌာန၊ အမှတ်(၁) အကြီးစားစက်မှုလုပ်ငန်း(ရုံးချုပ်)၊ ရုံးအမှတ်(၃ဝ) တွင် ရယူ နိုင်ကြောင်း ထုတ်ပြန်ချက်တွင်ပါရှိသည်။

အလုပ်ရုံစိတ်မှူးရာထူး လျှောက်ထားသူများအား  မြန်မာ၊ အင်္ဂလိပ်၊ အထွေထွေဗဟုသုတ ရေးဖြေစာမေးပွဲ‌များကို ဖြေဆိုရမည်ဖြစ်ပြီး ထုတ်လုပ်ရေးကျွမ်းကျင် (၅)နှင့် လုပ်သားရာထူး လျှောက်ထားသူများကို  လူတွေ့စစ်ဆေးသွား မည်ဖြစ်ကြောင်း ထုတ်ပြန်ထားသည်။

ထို့ပြင် လျှောက်လွှာများကို အမှတ်(၁) အကြီးစားစက်မှုလုပ်ငန်း(ရုံးချုပ်)၊ နေပြည်တော်နှင့် အမှတ်(၁)သံမဏိ စက်ရုံ (မြင်းခြံ)တို့တွင် ဩဂုတ်လ (၂၅)ရက်မှ စက်တင်ဘာလ (၂၅)ရက်အထိ ပေးပို့လျှောက်ထားနိုင်ကြောင်း သိရသည်။